Në kohën që bota ditët e fundit është pushtuar nga frika e koronavirusit dhe rreziqet që ky fenomen mbart, një mjek francez duket se ka gjetur një kurë shumë efikase për ta luftuar atë.
Bëhet fjalë për drejtorin e Institutit Mesdhetar për Infeksionet në Marsejë, Didier Raoult i cili ka deklaruar për AFP-në se mjekimi i përdorur prej shumë kohësh me klorokinë kundër malaries ka rezultuar efikas dhe për shërimin nga koronavirusi.
Raoult ka zbuluar ndër të tjera se për këtë është mbështetur në rezultatet e një studimi klinik kinez.
“Ne dimë tashmë se klorokina ishte efikas in vitro kundër këtij koronavirusi të ri dhe vlerësimi klinik i bërë në Kinë e konfirmoi një gjë të tillë », shpjegon profesor Raoult, specialist i njohur i sëmundjeve infektive, duke komentuar publikimin e parë mbi këtë studim klinik të tre studiuesve kinezë në revistën BioScience Trends. “Përfundimisht, ky infeksion është, ndoshta, më i thjeshtë dhe më pak i kushtueshëm për t’u mjekuar se të gjitha infeksionet virusale”, thekson ai.
Ndërsa nga ana tjetër një artikull i botuar online më datë 19 shkurt ka publikuar rezultatet e një testi klinik të bërë në më shumë se dhjete spitale kineze në Ëuhan, Pekin dhe Shangai.
Qëllimi i këtij artikulli ishte për të parë efikasitetin e klorokinës në trajtimin e pneumonive që shoqërojnë koronavirusin ose që njihet ndryshe me termin COVID-19.
Studiuesit kinezë shprehen se rezultatet e deri tanishme mbi 100 pacientë që janë trajtuar dhe vëzhguar zbulojnë se osfati i klorokinës është më efikas se trajtimi i marrë nga një grup krahasues për të penguar avancimin e pneumonisë, për të përmirësuar gjendjen e mushkërive, në mënyrë që pacienti të rikthehet në negativ ndaj virusit, si dhe për të shkurtuar kohën e sëmundjes.
Por kësaj situate i shtohet edhe një element tjetër, që klorokina është një medikament që kushton shumë pak dhe nuk ka efekte anësore dhe ka përdorim që daton 70 vjet përpara, citon ndër të tjera artikulli.
Kërkuesit shkencor theksojnë se 500 mg klorokinë në ditë mjafton për 10 ditë rresht.
Në lidhje me këtë ka folur dhe ministri francez i Shëndetit, Olivier Veran ku ka thënë se kishte biseduar disa herë me Didier Raoult.
“Ai më ka vënë në dijeni për vëzhgimet e tij dhe studimet ku bazohej. Unë ia kam transmetuar Drejtorisë së Përgjithshme të Shëndetit, e cila është duke bërë të gjitha analizat e domosdoshme”. “Dihet se ka disa studime interesante, në fakt, mbi një ndikim in vitro, por studimet mbi pacientin kanë nevojë akoma për t’u përcaktuar”, është shprehur ai në një prononcim.
