Italia ditët e fundit po përjeton një panik për shkak të koronavirusit të rrezikshëm.
Pas 7 viktimave dhe mbi 220 të infektuarve, populli fqinj duket se është në ankth dhe menjëherë kanë rendur që të zbrazin supermarketet dhe të kenë rezerva ushqimore në mënyrë që të qëndrojnë të izoluar.
Por nga ana tjetër kryebashkiaku i Milanos ka një thirrje për të gjithë qytetarët italianë, ku ka deklaruar se në vend të rendin drejt supermarketeve për të blerë ushqime, duhet të kujdesen për familjarët e tyre, kryesisht të moshuarit.
“Qeveria dhe rajoni i Lombardisë kanë përcaktuar rregulla për të kufizuar përhapjen e koronavirusit. Më lejoni ta them që në fillim, këto rregulla nuk diskutohen. Ato zbatohen!
Ne duhet të besojmë në arsyetimin për të sulmuar përhapjen e virusit. Eshtë e vërtetë që rastet janë në rritje, por ndoshta varet edhe nga fakti që ne, në mënyrë proaktive përpiqemi të identifikojmë se kush është prekur nga virusi. Bashkia po i bën shërbimet të funksionojnë në mënyrën më të mirë të mundshme. Pastrimi, transporti dhe siguria. Zyrat tona janë dhe mbeten të hapura.
Në fund, unë dua t’ju jap një këshillë, që e kam më shumë në zemër nga pikëpamja personale.
Në vend që të mendojmë për të vrapuar drejt supermarketeve për të rrëmbyer ushqime, le të mendojmë që ta zëmë kohën tonë duke u kujdesur për njerëzit më të rrezikuar, veçanërisht të moshuarit tanë. Kjo është ajo që bën një shoqëri e ndjeshme dhe e pjekur”, thuhet në mesazhin e kryebashkiakut.
