Ditën e djeshme një grabitje me dhunë ndodhi në fshatin Cernem të Maqellarës.
Një grup prej 6 personash hynë në banesën e një çifti të moshuarish, fëmijët e të cilëve ishin në emigrim, dhe rrahën dhe më pas vodhën të dy bashkëshortët Rrahman dhe Hasije Dulja.
Ndërkohë ditën e sotme policia ka arritur të identifikojë autorët, ku 4 prej tyre i ka vënë në pranga dhe dy të tjerë janë shpallur në kërkim.
Sipas njoftimit të policisë të arrestuarit janë shtetasit: A.V., 23 vjeç, S.C., 23 vjeç, E.P., 22 vjeç dhe Z.E., 25 vjeç, banues në Njësinë Administrative Maqellarë, Dibër. Ndërsa po punohet për kapjen e shtetasve K. B., 35 vjeç dhe A. G., 30 vjeç, bashkëpunëtorë në vjedhjen me dhunë.
Këta persona në bashkëpunim me njëri-tjetrin hynë në banesën e shtetasit R. D. dhe nëpërmjet dhunës kishin morën disa sende me vlerë.
Policia njofton se është bërë e mundur dhe gjetja e disa provave materiale të vjedhura në banesën e shtetasit R. D., të fshehura në banesën e autorit të dyshuar S. C.
Materialet do t’i kalojnë për veprime të mëtejshme, Prokurorisë së Rrethit Gjyqësor Dibër, për veprën penale “Vjedhja me dhunë, kryer në bashkëpunim”.
