Ish kryeministri Sali Berisha ka dhënë një prononcim për mediat pas vizitës se ekspozitës së Avni Delvinës, deklarata e parë kjo pas dorëzimit të mandatit të deputetit një ditë më parë.
Berisha i bëri thirrje socialistëve që të largojnë sa më parë kryeministrin Edi Rama, pasi sipas tij është rrezik kombëtar dhe urrejtja ndaj tij bëhet çdo ditë me e pakufishme.
“Çdo gjë ka një fund dhe ky fund është i afërt. Unë u bëj thirrje socialistëve. Në interesin më të mirë të tyre dhe të Shqipërisë, të largojnë me urgjencë Edi Ramën dhe klikën e tij nga pushteti. E them me bindjen më të thellë se urrejtja ndaj Ramës dhe regjimit të tij bëhet çdo ditë e më e pakufishme”, tha ndër të tjera Berisha.
Më tej, Berisha iu drejtua Kryeministrit Rama, duke i thënë të largohet sa më parë. “Edi Rama është kufomë politike, të largohet një minutë e më parë nga politika sepse do ta largojnë në mënyrë të paimagjinueshme. Ka 6 vjet që po poshtëron çdo ditë shqiptarët dhe shet gënjeshtra nga mëngjesi deri në darkë. Tani, ik dhe vetëm ik!”, tha Berisha.
Berisha u pyet nëse do të futet opozita në zgjedhjet vendore të qershorit: “Opozita po bën përgatitje të ethshme për zgjedhjet, por zgjedhje më Edi Ramën nuk do të ketë më”.
Ish-Kryeministri foli edhe për mosbindje civile, madje dhe për grusht shteti. “Mosbindja civile vlon në shpirtin e çdo qytetari. Nuk kam nevojë të ndërhyj unë. Po shkohet në mosbindje civile. Jemi në kushtet e grushtit të mirëfilltë të shtetit”, tha Berisha, duke e mbyllur fjalën e tij me thirrje për socialistët që të largojnë Ramën.
Kujojmë se vëtm një ditë më parë u zhvillua protesta e opozitës së bashkuae, e cila u finalizua me dorëzimin e mandateve nga deputetët e opozitës.
