LIGJET E BIZNESIT
Ministri i Jashtëm i Greqisë ka kërkuar hapjen e negociatave me Shqipërinë sa më shpejt të jetë e mundur, duke theksuar se vendi ynë ka përmbushur të gjitha kushtet.
Gjatë një takimi me ministrin e Jashtëm kroat, Gordan Radman, Nikos Dendias i ofroi Kroacisë ndihmën e Greqisë për hapjen e negociatave me Shqipërinë dhe Maqedoninë e Veriut dhe integrimit të vendeve të Ballkanit Perëndimor gjatë presidencës së BE-së. Duke parë tensionet e fundit në rajonin e Mesdheut, një BE e qëndrueshme është në interesin e Greqisë.
“Integrimi i Ballkanit përbën një qëllim strategjik për Greqinë, që nga Samiti i Selanikut, në vitin 2003. Ne jemi të bindur se kjo është mënyra më e mirë për të promovuar paqen, stabilitetin dhe prosperitetin në rajonin tonë”, u shpreh ministri i Jashtëm grek. “Natyrisht, ne mezi presim Samitin e Zagrebit për të marrë dritën jeshile për negociatat me Shqipërinë dhe Maqedoninë e Veriut”, u shpreh Dendias, citon Greece City Times.Sipas Athinës zyrtare, Tirana dhe Shkupi i kanë përmbushur kushtet e kërkuara. “Vendimi për hapjen e negociatave të pranimit me Maqedoninë e Veriut dhe Shqipërinë duhet të merret sa më shpejt të jetë e mundur është e rëndësishme, në mënyrë që të sigurohet vazhdimësia e reformave në të dyja vendet, si dhe stabiliteti në rajon. Sigurisht kushtet e kërkuara janë përmbushur”, u shpreh Dendias.
Pasi foli për marrëdhëniet e Greqisë me Turqinë dhe veprimet e këtij vendi të fundit në Mesdheun Lindor, Dendias tha se “Presidenca Kroate ka një rol të madh në lidhje me marrëdhëniet me Turqinë”, por kjo kërkon diskutim të mëtejshëm.
“Sa i përket kufijve të jashtëm të BE-së, qeveria ime po bën çmos për të krijuar një mënyrë më të mirë për të mbrojtur kufijtë e Bashkimit Europian”, tha ministri i jashtëm grek, por duke marrë parasysh “mjedisin tonë detar, ishujt, afërsia me brigjet e Turqisë, kjo nuk është gjëja më e lehtë”.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Deklarata e ministrit vjen pas një takimi në Bruksel midis kryeministrit grek Qiriakos Mitsotaqis me Presidentin e Këshillit Europian Charles Michel, ku diskutuan për çështjen e negociatave. Në ditët në vijim, Michel do të takohet me të gjithë liderët e vendeve anëtare për të dalë me një propozim përfundimtar për hapjen e negociatave në samitin e Këshillit të BE-së në mars, shkruan Shekulli.
Për Greqinë kushti kryesor për negociatat ka qenë respektimi i të drejtave të minoritetit grek në vendin tonë, duke kërcënuar disa herë me vendosjen e vetos. Por deklarata e fundit e kreut të diplomacisë greke dërgon një sinjal pozitiv se këto mosmarrëveshje duket se po shkojnë drejt zgjidhjes. Në janar të këtij viti, vetë kryeministri Mitsotakis paralajmëroi Shqipërinë se nuk do të ofronte mbështetjen e tij për negociatat për aq kohë sa nuk respektohen të drejtat e minoritetit grek .
Në një dalje publike, ai ritheksoi dhe njëherë se parakusht për integrimin e Shqipërisë në Bashkimin Europian është minoriteti dhe respektimi i të drejtave. “Ne nuk duam që të mbyllen dyert e BE-së, por posaçërisht për Shqipërinë ka parakushte për respektimin e pakicës greke” tha ai. Mitsotakis i dërgoi madje një mesazh kryeministrit shqiptar Edi Rama “Mesazhi është që ne ju mbështesim, por nuk mund të pranojmë që të drejtat e pakicës greke të mos mbrohen”, tha ai. Por deklarata e fundit e ministrit të jashtëm sinjalizon se është bërë përparim në këtë çështje.
