LIGJET E BIZNESIT
Kreu i Vetvendosje, Albin Kurti ka dedikuar një postim prekës për aktivistin e kësaj lëvizje Hysni Hyseni nga Prizreni. Ky i fundit ndërroi jetë ditën e sotme në spitalin e Prishtinës.
Ndërsa përmes një postimi në rrjetin social Facebook, Kurti shprehet se pa punën e të ndjerit, Hysenit, nuk do të mund të ndodhte fitorja e Vetëvendosjes në Prizren. Ndërsa më tej, Kurti tregon se ai kishte humbur syrin në protestën e 10 shkurtit të 2017-ës.
“Dhembja që ndjejmë është e madhe, pikëllimi që na ka mbërthyer është i rëndë, humbja që përjetuam është e vështirë”, shkruan Kurti.
Postimi i plotë i Albin Kurtit:
Kur e vizitova para dhjetë ditëve ishte rëndë por kishte vetëdije, të nesërmen kishte përjetuar infarktin e parë, kurse dy ditë më vonë e gjeta në komë të intubuar. Doda vdiq sot. Në QKUK në Prishtinë, në repartin intenziv të Klinikës Infektive, vdiq në mëngjes Hysni Hyseni – Doda, aktivist i dalluar i Lëvizjes VETËVENDOSJE!.
As një vit nuk ishte më i moshuar se unë, por askush, e as unë, nuk mund të mateshim me të për nga aktiviteti i dendur që bënte. Në protestën e 10 shkurtit 2007 ku u vranë Mon Balaj e Arben Xheladini, u patën plagosur e lënduar mbi 80 qytetarë, e më së rëndi pikërisht Hysni Hyseni nga Prizreni që humbi syrin e djathtë, Mustafë Nerjova nga Lubishda e Hasit që edhe sot e kësaj dite ka një pjesë plastike në kokë në vend të kafkës që ia çanë me plumb dhe Zenel Zeneli nga Bardhoshi i Prishtinës i cili ende i ka dy plumba në trup njërin shumë afër zemrës.
Ndryshimi në Prizren me fitoren e Mytaher Haskukës në vjeshtën e vitit 2017 do të ishte i pamundur pa punën e palodhshme të Dodës, i cili mua asokohe m’i mësoi të gjitha çajtoret e Kurillës dhe jo vetëm. Ka lënë pas vetes gruan, katër vajzat dhe një djalë. Dhembja që ndjejmë është e madhe, pikëllimi që na ka mbërthyer është i rëndë, humbja që përjetuam është e vështirë. Kujtimi ynë për Dodën do të jetë përjetë i gjallë, porsi gjallëria e tij jetësore.
