Policia e Shtetit ka publikuar ditën e sotme fotografitë dhe skedat e 5 personave më të kërkuar në Shqipëri.
Gjithashtu uniformat blu i bëjnë thirrje qytetarëve që të bashkëpunojnë me strukturat, që nëse kanë informacione për vendodhjen e tyre të telefonojnë në numrin 112, duke garantuar anonimatin e plotë dhe reagim të menjëhershëm.
Mësohet se në listat e kërkimit të policisë janë 50 persona, si të shumëkërkuar.
NJOFTIMI ZYRTAR I POLICISE
50 personat më të kërkuar në Shqipëri, objekt i punës së Njësisë së Kërkimit.
Në kuadër të punës për kapjen e personave të shpallur në kërkim, nisur nga rrezikshmëria e theksuar e secilit prej personave, bazuar në veprën penale që ka kryer dhe në masën e dënimit të marrë nga gjykatat, duke filluar nga masa më e rëndë, burgim i përjetshëm dhe deri në 25 vjet burgim, është përcaktuar lista me 50 personat më të kërkuar, që do jenë objekt i punës së forcës së posaçme.
Njësia e Kërkimit do të marrë gjithë masat e duhura për realizimin e kërkimit të këtyre personave dhe kapjen e tyre, duke bashkëpunuar me strukturat përkatëse në Drejtoritë Vendore të Policisë, si dhe me strukturat homologe të vendeve evropiane që bëjnë pjesë në rrjetin ENFAST.
Policia e Shtetit është e vendosur për të kapur dhe çuar para drejtësisë të gjithë personat e kërkuar dhe në këtë kuadër kërkon edhe bashkëpunimin e qytetarëve që pas çdo publikimi të fotove të personave në kërkim, në rast se disponojnë informacion mbi vendndodhjen e tyre, të njoftojnë në “Komisariatin Dixhital” apo numrin falas 112, duke u siguruar anonimat të plotë dhe reagim të menjëhershëm.
#112PoliciaeShtetit
