U plagos nga atentati me granatë në zyrë, flet për herë të parë kryebashkiaku Fatos Tushe

Kryetari i Bashkisë së Lushnjes Fatos Tushe ka folur për herë të parë pas atentatit me granatë që iu bë në zyrën e tij më 31 dhjetor të 2019.

Ai ka deklaruar se është drejtësia ajo që do të vendosë për ngjarjen dhe se prej kohësh nuk ka më asnjë kontakt me ish-shoferin e tij.

‘Ndodhem në punë sot, kalova plagë të lehta, dëmtime të lehta, plagë më të rënda janë ato që shkruhen dhe thuhen në media. Drejtësia do të vendosë të thojë fjalën e saj për atë që ka ndodhur.

Do të jetë drejtësia që do të vendosë lidhur me të gjithë këtë. Nuk kam pasur kontakte me ish-shoferin tim prej shumë kohësh.

Ju lutem, siç iu thashë dhe pak më parë do të jetë drejtësia ajo që do të flasë për të gjitha’, tha Tushe për Faxnews.

Kujtojmë se një atentat në zyrën e kryetarit të Bashkisë Fatos Tushe tronditi Lushnjen mesditën e 31 dhjetorit.

Ish-shoferi i Tushes, Gëzim Saraçi hodhi një granatë brenda në zyrë, ku si pasojë e shpërthimit mbeti i plagosur Fatos Tushe dhe sekretarja e tij Erisa Qalliu.

Sipas dyshimeve shoferi ishte pushuar nga puna dhe ishte në konflikt prej kohësh me kreun e Bashkisë.