Greqia pezullon kalimin e mjeteve të tonazhit të rëndë nga Kapshtica

Drejtoria Vendore e Kufirit dhe Migracionit në Korçë, përmës një njoftimi bën të ditur se të gjithë drejtuesit e mjeteve të tonazhit të rëndë, nuk lejohen të shkojnë në Greqi. Ndërkaq, shkak për këtë bllokim është, pasi kërkohet të shmanget vështirësia në qarkullim, si pasojë e akullit në rrugë.

“Njoftohemi nga pala greke në Pikën e Kalimit Kufitar Kapshticë, se në datën 05.01.2020, nga ora 06:00 deri në orën 23:59 të datës 06.01.2020, nuk do të lejohet kalimi i mjeteve të tonazhit të rëndë (kamionë) në drejtim të Greqisë, për të shmangur problemet dhe vështirësitë në qarkullim, si pasojë e prezencës të akullit në rrugë.

Do të lejohet kalimi i autoveturave dhe autobusëve të cilët duhet të jenë të pajisur me zinxhirë. Policia Kufitare, apelon drejtuesit e mjeteve të tonazhit të rëndë, që kanë planifikuar lëvizjen për në shtetin grek nëpërmjet pikës kufitare Kapshticë, ta shmangin ose të përdorin pikat e tjera të kalimit kufitar me Greqinë, deri në normalizimin e situatës”, shkruhet në njoftim.