Mëngjesin e sotëm kryeministri i Maqedonisë Zoran Zaev ka deklaruar se e ka nënshkruar dokumentin e dorëheqjes.
Me këtë situatë të krijuar tani kryetari i Kuvendit duhet të mbledhë seancën në parlament, ku do të konstatohet dorëheqja.
“Besoj se shumë shpejt do të arrijë në Kuvend, që gjatë ditës të fillojë procedura dhe përfundojnë punët për zgjedhjet e qeverisë kalimtare”, tha Zaev, në emisionin “Utrinski Brifing”, njoftoi INA.
Zaev u shpreh se pret që e gjithë procedura të kalojë pa problem, sepse është vendosur si praktikë që në vitin 2016, me kërkesë të LSDM kur ishin në opozitë.
Pas konstatimit të dorëheqjes, kryetari i Kuvendit, Talat Xhaferi, njofton presidentin e shtetit Stevo Pendarovski, i cili duhet t’i japë mandatin ministrit të Punëve të Brendshme, Oliver Spasovski, i cili nga organet më të larta të LSDM-së, u propozua si kryeministër teknik, e për të cilin ka dakordësi edhe nga partia opozita VMRO-DPMNE.
Spasovski duhet të propozojë qeverinë e re, ndërsa Kuvendi do të votojë më pas dhe e gjithë kjo qeveri do të udhëheqë vendin deri sa formohet e reja në vazhdimësi.
