Ai është një nga aktorët më të njohur dhe më të dashur të humorit për publikun shqiptar.
Bëhet fjalë për Albano Bogdon, i cili së fundmi ka rrëfyer një periudhë të vështirë dhe të errët që ka kaluar në jetën e tij.
I ftuar në programin “ThumbOn” në RTV Ora, Albano është kthyer pas në kohë duke treguar sesi rrinte i dehur pjesën më të madhe të ditës duke u shndërruar në një alkoolist.
Më pas ndër të tjera ai rrëfeu se si arriti të hiqte dorë nga alkooli dhe ndihej shumë keq sa e gjithë situata e ktheu në një njeri pa prespektivë në jetë.
“Alkooli është si puberteti. E nis të pëlqen dhe e shton pastaj. E nisa me një shishe dhe vajta në konsumimin e katër shisheve në ditë. Në shumicën e rasteve pija vetëm. U zgjova një ditë dhe thjesht e lashë. E kuptova që isha shndërruar në njeri pa perspektivë. E lashë pa klinikë dhe pa ndihmë, brenda ditës. Kur ke moment të vështirë nuk ke lekë të pishë 4 shishe në ditë. Jam i lumtur që e kam hedhur pas krahëve atë periudhë. Ditën e shfaqjes nuk pija asnjë pikë. Sa mbaronte shfaqja filloja.
Kur bëhesha tap bëja gjeste idiote, që s’jam krenar që i kam bërë. Shkoja i ulesha çifteve në tavolinë dhe i thoja asaj: Ku e ke gjetur këtë idiotin, ti je 2 metra femër. Shikoja një gocë dhe i ulesha në tavolinë. Jemi zënë jemi qëlluar, me grushta kështu. Kam përfunduar edhe në rajon”, tregoi Albano.
