Plas sherri në diskotekë, shqiptari goditet me shishe në kokë, përfundon me urgjencë në spital

Një sherr masiv ka ndodhur natën që lamë pas rreth orës 02.00 në Itali, ku ka mbetur i plagosur dhe një shqiptar.

Të paktën 10 persona u përfshinë në përleshjen masive brenda ambienteve të diskotekës “La Grotta di Artegna” në Udine.

Gjithçka nisi me fjalë, ndërsa më pas skena degjeneroi në ofendime të rënda dhe në dhunë fizike, ku janë përdorur mjetet e forta.

I riu shqiptar me banim në Friuli, u godit në kokë me shishe dhe për pasojë u dërgua me urgjencë në spital. Ai pësoi dëmtime të rënda dhe çarje të thella në trup.

Tre persona të tjerë, një punëtor shqiptar që banon në Tavagnacco, një punonjës 20-vjeçar nigerian dhe një picajol 26-vjeçar gjithashtu me kombësi shqiptare u arrestuan nga autoritetet italiane, ndërsa janë marrë në pyetje për gjithçka ndodhi në diskotekë.

Policia ka nisur menjëherë hetimet për të zbardhur shkaqet e ngjarjes.