Një grua 31-vjeçare ka shkuar në një spital për të ngrirë vezët, duke qenë se mosha po kalonte, por nuk e kishte gjetur ende partnerin ideal. Teresa Xu u drejtua për tek Spitali Obstetrik-Gjinekologjik të Pekinit në Kinë për të ruajtur vezët e për t’u fokusuar tek karriera.
Por doktorët refuzuan ta kryenin procesin duke qenë se ajo ishte e pamartuar. Kjo kundërshti nga ana e mjekëve është bërë shkak që Teresa Xu t’i padisë spitalin dhe doktorët në gjyq sepse nuk mori shërbimin që kërkoi.
Gjyqi pritet të zgjasë disa muaj, por ka shkaktuar shumë reagime në rrjetet sociale. Shumë prej njerëzve mbështesin gruan 31-vjeçare. Në Kinë ka pasur një kërkesë në rritje për të ngrirë vezët.
Nga ana tjetër, 31-vjeçarja me profesion redaktore, ka deklaruar për mediat vendase se këtë vendim të sajin e kanë kundërshtuar edhe kolegët e saj. Ata i kanë kërkuar që më mirë të lërë punën dhe të martohet, sesa të ngrijë vezët. “Erdha këtu për një shërbim profesional, por në vend të kësaj dikush më kërkoi që të lija punën dhe të bëja një fëmijë”, ka treguar Teresa Xu.
