Ditën e djeshme Kuvendi pas një seance të gjatë maratonë që nisi në mëngjes, ka miratuar ndryshimet në ligjin e medias për AMA-n dhe AKEP.
Këto ndryshime, të cilësuara ndryshe edhe si ligji-antishpifje nga kryeministri Edi Rama, kanë shkaktuar tensione dhe mjaft debate ditët e fundit mes qeverisë dhe gazetarëve.
Gazetarët i kundërshtojnë fort këto ndryshime pasi pretendojnë se cënojnë fjalën e lirë dhe lirinë e shprehjes së një media.
Gjatë kohës që është zhvilluar dhe seanca parlamentare e fundit për këtë vit, gazetarë dhe aktivistë të shoqërisë civile kanë protestuar në sheshin përballë Kuvendit, kundër miratimit të këtij ligji.
Nga ana tjetër kryeministri dhe mazhoranca nuk kanë qenë të vetmit që e kanë mbrojtur dhe miratuar këtë ligj.
Pesë deputetë nga opozita parlamentare bashkuan votat me socialistët për të miratuar këtë paketë aq shumë të diskutuar.
Ata janë Ylli Shehu, Edmond Rrushi, Aurora Mara, Edjola Braha dhe Nimet Musai, të cilët kanë ngritur kartonat jeshilë për të miratuar rregullat e reja në funksionimin e medias, kryesisht atë online.
