A do ta dekretojë paketën anti-shpifje? Vjen përgjigja e Ilir Metës

Ditën e sotme paketa anti-shpifje që është cilësuar si një projektligj që synon të kapë mediat dhe të cënojë lirinë e shprehjes, pritet të kalojë në Kuvend për tu miratuar nga deputetët.

Anëtarë të shoqërisë civile që kanë kundërshtuar ashpër këtë ligj, po zhvillojnë një protestë përpara parlamentit.

Ata i kanë bërë thirrje presidentit Ilir Meta që ta kthejë këtë ligj për rishqyrtim nëse kalon në Kuvend.

Por si do të veprojë kreu i Shtetit në një moment kur të gjithë i kanë sytë nga ai?

“Zoti President, sot në Parlament po diskutohet ligji i ashtuquajtur ‘anti-shpifje’. Ndërkohë gazetarët po kërkojnë që ky ligj të mos dekretohet nga ana juaj. Si do të veproni”, u pyet Meta.

“Të shohim si do të jenë zhvillimet. Unë shpresoj të mos bëhen veprime të nxituara. Çdo veprim i imi do të jetë institucional dhe do të jetë transparent, por nuk mund të gjykoj asgjë”, tha Presidenti për “Ora News”.

Pyetje: Më parë ju jeni shprehur se do ta mbroni me çdo kusht Kushtetutën dhe kishit paralajmëruar një tubim. Por për shkak të fatkeqësisë natyrore ju e shtytë atë tubim. Si do ta veproni tani?

Presidenti: Unë e mbroj Kushtetutën çdo ditë edhe në çdo moment, që nga çasti që kam vënë dorën mbi Kushtetutë, sepse kjo është detyra kryesore e Presidentit të Republikës. Padyshim që kjo nuk është vetëm detyrë e Presidentit, por është e të gjithë popullit shqiptar, i cili e ka miratuar Kushtetutën me referendum më 22 nëntor të vitit 1998 dhe i cili për fat të keq që nga ajo periudhë e deri më tani ka lejuar t’i preket Kushtetuta në kohë të ndryshme, duke tronditur themelet e shtetit të së drejtës, gjë që ndihet sot nga të gjithë qytetarët shqiptarë. Presidenti së bashku me qytetarët do të përforcojnë themelet e Kushtetutës, që u votua më 22 nëntor 1998. Kjo është detyra ime dhe është detyra e të gjithëve ne.