Ish-deputetja e Partisë Socialiste Arta Dade vijon të mbajë të njëjtin qëndrim se kryeministri Edi Rama duhet të largohet nga pushteti dhe se vendi nuk po qeveriset prej një viti.
E ftuar në programin “5 pyetje” me drejtues Ilir Babaramon, Dade u shpreh se Rama dhe politikanë të tjerë si ai do të mbeten në histori për ato që nuk kanë bërë.
Ndër të tjera, sipas Dades, Partia Socialiste ka qenë forca që i ka dhënë vendit shumë për ta drejtuar, ndërsa sot ajo nuk funksionon.
“Mua më duket që vendi nuk po qeveriset prej 1 viti. Mesa duket nuk po e shoh që Rama të largohet. Ka politikanë që mbeten në histori për ato që kanë bërë dhe për ato që duhet të kishin bërë, por që nuk kanë bërë.
Për fatkeqësisht Partia Socialiste që ka qenë forca që i ka dhënë vendit shumë për ta drejtuar andej nga duhet dhe tashmë kemi ardhur në një pikë që forca politike nuk funksionon, po as vendi jonë nuk qeveriset”, tha Dade.
