LIGJET E BIZNESIT
Shqipëria synon të presë 15.5 milionë shtetas të huaj gjatë vitit 2027, ndërsa objektivi për vitin 2029 është arritja e 16 milionë hyrjeve. Këto janë parashikimet e përcaktuara në relacionin e projektbuxhetit 2027, ku janë prezantuar edhe objektivat afatmesme për zhvillimin e sektorit të turizmit.
Sipas dokumentit, kontributi i turizmit në Prodhimin e Brendshëm Bruto parashikohet të jetë rreth 33% gjatë periudhës 2027-2029. Ndërkohë, punësimi në këtë sektor pritet të rritet gradualisht, nga 8.6% në vitin 2026, në 8.7% në vitin 2027 dhe 8.8% në vitet 2028-2029. Në fokus të objektivave është edhe zgjerimi i kapaciteteve akomoduese. Numri i strukturave akomoduese synohet të arrijë në 2,100 gjatë vitit 2027 dhe të rritet në 2,150 deri në vitin 2029.
Një tjetër sektor ku parashikohet zgjerim është agriturizmi. Sipas relacionit, numri i bizneseve në këtë fushë synohet të rritet nga 400 në vitin 2027, në 650 në vitin 2029. Sa i përket turizmit kulturor, objektivi është që numri i vizitorëve në sitet kulturore të arrijë në 950 mijë gjatë vitit 2027 dhe në 980 mijë deri në fund të vitit 2029.
Përtej rritjes së numrit të turistëve dhe kapaciteteve akomoduese, një nga drejtimet e përcaktuara në projektbuxhet është diversifikimi i produktit turistik. Synimi është zhvillimi i një turizmi gjithëvjetor, duke zgjeruar ofertën përtej sezonit tradicional veror.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
