LIGJET E BIZNESIT
Shishet plastike dhe ambalazhet e pijeve mund të kthehen kundrejt rimbursimit të parave. Shqipëria synon të zbatojë një sistem të ri depozitimi dhe kthimi të ambalazheve, sipas një modeli që funksionon prej vitesh në disa vende europiane. Nisma ligjore, e hartuar nga Ministria e Mjedisit, është aktualisht në proces konsultimi publik. Sistemi, i njohur si DRS, parashikon që konsumatorët të paguajnë një depozitë gjatë blerjes së një pijeje dhe ta marrin atë mbrapsht kur dorëzojnë ambalazhin e përdorur në një pikë të autorizuar kthimi.
Ky mekanizëm zbatohet në Gjermani, ku depozita për shumë shishe plastike dhe kanaçe njëpërdorimëshe është 25 cent. Kroacia e ka sistemin në funksion që prej vitit 2006, ndërsa Rumania e nisi zbatimin në vitin 2023, me një depozitë prej 50 bani për ambalazh. Austria iu bashkua vendeve që zbatojnë këtë model në janar të vitit 2025.
Përvoja europiane tregon norma të larta kthimi të ambalazheve, të nxitura nga përfitimi financiar për konsumatorët. Në Gjermani, norma e kthimit raportohet të arrijë rreth 98%, ndërsa në Danimarkë kalon 90%. Për zbatimin e skemës në Shqipëri, projektvendimi parashikon krijimin e një infrastrukture të posaçme, që do të përfshijë makineri automatike për pranimin e ambalazheve, sisteme elektronike identifikimi dhe etiketa për gjurmimin e tyre. Kostot e ngritjes dhe funksionimit të sistemit do të mbulohen nga sektori privat, përfshirë prodhuesit, importuesit dhe operatorët e tjerë ekonomikë. Shpenzimet do të përfshijnë pajisjet, grumbullimin, transportin dhe administrimin e depozitave.
Sipas relacionit shpjegues, parashikohet një periudhë tranzitore deri më 31 dhjetor 2028 për ngritjen e plotë të sistemit. Megjithatë, ende nuk është përcaktuar shuma që do të rimbursohet për çdo ambalazh, lista përfundimtare e produkteve që do të përfshihen apo organizimi konkret i pikave të kthimit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
