LIGJET E BIZNESIT
PNUD-i do të japë rreth 76.3 milionë dollarë për Shqipërinë në kuadër të Programit të ri për periudhën 2027–2031. Dokumenti pesëvjeçar, i miratuar nga Bordi Ekzekutiv i UNDP-së, synon të mbështesë zhvillimin ekonomik dhe social të vendit, si edhe reformat që lidhen me procesin e anëtarësimit në Bashkimin Europian.
Programi mbështetet në tri fusha kryesore, që janë zhvillimi i kapitalit njerëzor, transformimi ekonomik dhe rritja e gjelbër, si dhe forcimi i qeverisjes, drejtësisë dhe të drejtave të njeriut. Pjesa më e madhe e financimit të parashikuar, rreth 39 milionë dollarë, do të orientohet drejt zhvillimit të një ekonomie më konkurruese dhe të qëndrueshme ndaj ndryshimeve klimatike. Mbështetja do të përqendrohet te bizneset e vogla dhe të mesme, përdorimi i teknologjive të reja, përshtatja me standardet e Bashkimit Europian dhe hyrja në tregjet rajonale dhe ndërkombëtare.
Rreth 23 milionë dollarë parashikohen për punësimin, arsimin profesional dhe shërbimet sociale. Një prej objektivave është ulja nga 22.2 në 15 për qind e të rinjve nga 15 deri në 29 vjeç që nuk janë të përfshirë në arsim, punësim apo trajnim. Ndërkohë, pjesëmarrja e nxënësve në arsimin e mesëm profesional synohet të rritet nga 19 në 30 për qind deri në vitin 2031. Programi synon gjithashtu që numri i personave në nevojë që marrin shërbime sociale të arrijë në 43 mijë, ndërsa 42 bashki pritet të ofrojnë shërbime për të paktën tri kategori në rrezik. Parashikohet edhe trajnimi i 250 punonjësve socialë, si dhe trajtimi përmes mekanizmave të koordinuar të referimit i 2,500 rasteve të dhunës.
Rreth 14.4 milionë dollarë llogariten për forcimin e administratës publike, sistemit të drejtësisë, mekanizmave kundër korrupsionit dhe menaxhimit të financave publike. Ndër objektivat janë edhe mbështetja e 2,500 qytetarëve për të marrë shërbime të drejtësisë dhe informimi ligjor i 6 mijë personave në nevojë.
Programi është hartuar pas konsultimeve me më shumë se 600 përfaqësues të institucioneve, shoqërisë civile, grupeve të cenueshme, biznesit, akademisë dhe medias. Konsultimi i zhvilluar në internet ka marrë gjithashtu më shumë se 1 mijë përgjigje. Sipas dokumentit, 15 për qind e buxhetit do të përdoret për ndërhyrje të drejtpërdrejta në fushën e barazisë gjinore.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
