LIGJET E BIZNESIT
Qeveria ka hedhur për konsultim publik një projektligj të ri për pronat e shtetit, i cili bashkon rregullat për regjistrimin, inventarizimin, transferimin dhe përdorimin e tyre. Nisma parashikon shfuqizimin e dy ligjeve të vitit 2001, të cilat, sipas relacionit, kanë krijuar një kuadër të fragmentuar dhe paqartësi në ndarjen e përgjegjësive ndërmjet institucioneve. Agjencia Shtetërore e Pronës do të ketë rol qendror në regjistrimin dhe monitorimin e pasurive publike. Institucionet do të raportojnë çdo vit për kontratat e shitjes, qirasë, enfiteozës apo shkëmbimit, ndërsa Agjencia do të informojë Kryeministrin mbi zbatimin e ligjit. Pronat shtetërore jopublike mund të privatizohen përmes ankandit, të shkëmbehen me prona private ose të jepen me qira. Kalimi në pronësi private do të lejohet edhe në funksion të planeve vendore, kur pjesa shtetërore nuk është më e madhe se 20% e pronës që do të zhvillohet. Ndërkohë, plazhet, brigjet, ujërat territoriale, lumenjtë, liqenet dhe burimet natyrore klasifikohen si prona të patjetërsueshme. Subjektet private mund të fitojnë vetëm të drejtën e përdorimit të tyre, por jo pronësinë. Bashkitë do të raportojnë një herë në vit për pronat e transferuara. Nëse ato nuk përdoren sipas destinacionit, qeveria mund të revokojë pronësinë ose të drejtën e përdorimit. Shkelja parashikohet të dënohet edhe me gjobë prej 100 mijë lekësh.
Projektligji u jep gjithashtu 12 muaj kohë subjekteve private që të regjistrojnë pa kamatëvonesa titujt e vjetër të pronësisë, të cilët nuk janë pasqyruar më parë në kadastër. Sipas vlerësimit të ndikimit, nisma nuk sjell kosto shtesë për buxhetin, ndërsa shitja ose dhënia me qira e pronave pritet të gjenerojë të ardhura për shtetin.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
