LIGJET E BIZNESIT
Bumi i ndërtimit dhe mungesa e landfilleve rajonale po e detyrojnë qeverinë të krijojë një regjim të përkohshëm për depozitimin e inerteve. Projektvendimi i hedhur për konsultim publik parashikon që venddepozitimet e përkohshme të ndërtohen “përjashtimisht deri në ndërtimin dhe vënien në funksion të landfilleve rajonale për mbetjet inerte. Ministria e Mjedisit ka hedhur për konsultim publik projektvendimin “Për miratimin e rregullave, kërkesave dhe procedurave për venddepozitimet e përkohshme të mbetjeve inerte”, duke krijuar një regjim të ri për depozitimin e kontrolluar të mbetjeve nga ndërtimi dhe shembja. Drafti përcakton se këto venddepozitime do të ndërtohen “përjashtimisht deri në ndërtimin dhe vënien në funksion të landfilleve rajonale për mbetjet inerte”.
Sipas projektvendimit, venddepozitimet do të kenë karakter “përjashtimor dhe kalimtar” dhe nuk do të klasifikohen si landfille sipas legjislacionit aktual për mbetjet. Afati maksimal i funksionimit parashikohet të jetë tre vjet, me mundësi zgjatjeje vetëm një herë deri në dy vjet të tjera, në rast se infrastruktura rajonale nuk është ende funksionale.
Drafti ndalon pranimin e mbetjeve të rrezikshme, mbetjeve bashkiake, mbetjeve biodegraduese, automjeteve në fund të jetës, baterive dhe pajisjeve elektrike apo elektronike. Në venddepozitime do të lejohen vetëm mbetje inerte “si gurë, beton, tulla, tjegulla, qeramikë, materiale minerale të ngjashme dhe fraksione të tjera me karakteristikë të ngjashme të mbetjeve inerte”.
Një nga ndryshimet kryesore të draftit lidhet me rikuperimin e mbetjeve. Projektvendimi përcakton se operatorët duhet të zbatojnë “një kuotë minimale rikuperimi prej 45% të sasisë totale të mbetjeve të pranuara”, të cilat do të përdoren si materiale mbushëse apo materiale ndërtimi sekondare.
Drafti vendos gjithashtu detyrime të reja financiare për operatorët. Sipas projektvendimit, “fondet e nevojshme për mbylljen dhe rehabilitimin e venddepozitimeve të përkohshme të mbetjeve inerte sigurohen paraprakisht nga operatori, nëpërmjet një garancie financiare, përfshirë policën e sigurimit”.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Operatorët do të detyrohen të mbajnë regjistra të plotë për mbetjet e pranuara dhe të refuzuara, ndërsa raportimi do të kryhet pranë Agjencisë Kombëtare të Mjedisit përmes Sistemit të Informacionit të Monitorimit. Drafti kërkon që dokumentacioni të përmbajë “identitetin e mbajtësit të mbetjeve”, “vendin e origjinës”, “sasinë e ngarkesës” dhe “mjetin e transportit”.
Projektvendimi parashikon gjithashtu kërkesa teknike për funksionimin e venddepozitimeve, përfshirë “sistem për devijimin dhe menaxhimin e ujërave sipërfaqësore”, “masa për kontrollin e pluhurit” dhe “mjete për shuarjen e zjarrit dhe për ndërhyrje emergjente”.
Në aneksin teknik, drafti kërkon që operatorët të disponojnë pajisje si “sitë fraksionimi”, “thërmues betoni”, “separator magnetik” dhe “peshore” për procesin e riciklimit të mbetjeve inerte.
Projektvendimi përcakton gjithashtu se venddepozitimet nuk mund të ndërtohen në zona të mbrojtura, turistike apo pranë burimeve ujore. Distanca minimale do të jetë 300 metra nga puset e ujit dhe zonat e mbrojtura, si dhe 100 metra nga lumenjtë, liqenet dhe ligatinat.
