Qeveria rishikon prapë buxhetin, jep 15 mijë lekë bonus për familjet me ndihmë ekonomike

Qeveria rishikon prapë me Akt Normativ buxhetin e shtetit, pak ditë përpara përfunidmit të vitit buxhetor. Ministri i Financave, Petrit Malaj ka deklaruar se do të jepet një bonus prej 15 mijë lekë për familjet e varfra dhe personat me aftësi të kufizuar, si dhe për kujdestarët e tyre.

“Në total nga kjo nismë do të përfitojnë rreth 148,500 qytetarë me një fond total prej 2.2 miliardë lekë.
Një nga vendimet më të rëndësishme të ndërmarra nga Këshilli i Ministrave lidhet me përdorimin e fondeve nga ana e ministrive apo institucioneve buxhetore.
Është vendosur që për të gjitha ato fonde të cilat nuk do të shpenzohen nga ministritë apo institucionet buxhetore, do të kalojnë në Fondin e Veçantë të Pensioneve pranë Bankës së Shqipërisë”, ka thënë “Kjo shumë do të përdoret për Reformën e Pensioneve, të cilën kjo qeveri tashmë e ka nisur. Nëpërmjet këtij Akti Normativ ne do të mbështesim edhe sektorin e bujqësisë ku fermerët do të përfitojnë një shumë prej rreth 2 miliardë lekë shtesë nëpërmjet skemave mbështetëse.
Në total fondi i alokuar për vitin 2025, ku fermerët kanë përfituar drejtpërdrejt nëpërmjet këtyre skemave mbështetëse, shkon në masën 6.4 miliardë lekë, krahasuar me 5.3 miliardë lekë që ishte në vitin 2024”, ka deklaruar kreu i Financave.
Sipas ministrit, shëndetësia është një tjetër sektor që do të mbështetet nëpërmjet këtij Akti Normativ ku do të përfitojë 18 milionë euro shtesë, mbështetje për ilaçe në spitale.
Edhe pushteti vendor do të përfitojë nëpërmjet këtij Akti Normativ duke u mbështetur me rreth 1.2 miliardë lekë shtesë, fonde të cilat do të përdoren për të shlyer detyrimet më të vjetra të prapambetura.
“Në total, vlera që po i alokojmë pushtetit vendor është e barasvlefshme me rreth 40% të detyrimeve të prapambetura që kanë këto bashki”, u shpreh ministri.