Iu vjen rradha produkteve bujqësore dhe blegtorale, ngrihet Task Forca për formalizimin e tregut

Drejtoria e Përgjithshme e Tatimeve ka nisur një fushatë informuese dhe ndërgjegjësuese për tatimpaguesit që merren me tregtimin e produkteve bujqësore dhe blegtorale.

Në njoftimin përkatës bëhet me dije se fushata ka për qëllim rritjen e formalizimit të tregut, garantimin e sigurisë ushqimore dhe mbrojtjen e konsumatorit.

Gjatë dy javëve të para, fushata do të fokusohet në sensibilizimin e fermerëve dhe tregtarëve për rëndësinë e lëshimit të faturave tatimore të fiskalizuara për çdo transaksion.

Pas kësaj periudhe informuese, një Task-Forcë e posaçme, e përbërë nga inspektorë të Hetimit Tatimor dhe inspektorë të terrenit, do të nisë kontrollet intensive për të verifikuar zbatimin e detyrimeve fiskale.

Drejtoria e Përgjithshme e Tatimeve thekson se mungesa e faturave tatimore do të sjellë penalitete, sipas legjislacionit në fuqi. Administrata Tatimore po ashtu i bën thirrje të gjithë tregtarëve dhe prodhuesve që të respektojnë rregullat dhe të kontribuojnë në krijimin e një ekonomie të ndershme dhe të qëndrueshme.