Kozeta Garret, shqiptarja që udhëheq sigurinë kibernetike në Microsoft!

Nga një qytet i vogël shqiptar në zemër të teknologjisë globale, historia e Kozeta Garret është dëshmi e gjallë se guximi, vendosmëria dhe përkushtimi mund të të çojnë larg. Një nga shqiptaret që punon për gjigantin Microsoft, Garret ishte një ndër zërat më frymëzues në samitin “ACT Now 2025”, të organizuar nga Këshilli Shqiptar i Teknologjisë dhe Informacionit (ACTI), ku foli për një nga temat më kritike të kohës: sigurinë kibernetike në epokën e inteligjencës artificiale në cilësinë e drejtoreshës globale të Microsoft për sigurinë kibernetike.

E lindur në Fushë-Milot, nga dy prindër mësues ajo u rrit pranë bregdetit jonian, në Sarandë. Pasi u diplomua për matematikë në Universitetin e Tiranës, Kozeta ndoqi studimet në informatikë në Itali, dhe më pas një master në Holandë, duke ndërtuar një karrierë që do ta çonte deri në Microsoft.

“Jam vërtet e lumtur kur shoh që Shqipëria po ecën kaq përpara në teknologji dhe në aplikimin e inteligjencës artificiale,” – u shpreh ajo në intervistën për Business Magazine.

Historia e Kozetës është ajo e mijëra shqiptarëve që kanë ëndërruar më shumë dhe kanë punuar fort. Prania e saj në samit dhe fjalët e saj, nuk ishin vetëm mesazh shprese, por edhe thirrje për të ecur përpara. Sot, ajo angazhohet në çështje jetike për sigurinë digjitale dhe mbrojtjen e të dhënave, sidomos në një botë gjithnjë e më të ndërvarur nga AI./Business Mag