LIGJET E BIZNESIT
Në universitetin Northeastern, studentja Ella Stapleton vuri re se materialet për kursin e sjelljes organizative dukeshin të krijuara nga inteligjenca artificiale ChatGPT. Në mes të dokumentit kishte edhe një udhëzim për “zgjatje dhe detajim më të madh”, që duket si komandë drejtuar chatbot-it.
Stapleton, e cila ndoqi me kujdes edhe prezantimet e klasës, vuri re elemente të pazakonta si foto me njerëz me krahë shtesë dhe gabime drejtshkrimore, të cilat janë tipike për përmbajtjet e prodhuara nga AI. Kjo e shqetësoi, sidomos pasi në planprogramin e kursit profesori Rick Arrowood ndalonte përdorimin e inteligjencës artificiale nga studentët.
“Ai na thotë neve mos ta përdorim, por vetë e përdor,” tha Stapleton për The New York Times.
Ajo depozitoi një ankesë zyrtare dhe kërkoi rimbursim të tarifës së kursit, që kapte mbi 8,000 dollarë. Por kërkesa iu refuzua pak ditë pasi ajo u diplomua.
Profesori Arrowood pranoi për mediat se përdori ChatGPT për të përmirësuar materialet e kursit, dhe tani i tregon studentëve kur përdor AI-në, duke qenë më i kujdesshëm.
Ky rast është një shembull i përdorimit gjithnjë e më të shpeshtë të inteligjencës artificiale në arsimin e lartë. Një studim i vitit 2024 tregon se rreth 40% e profesorëve në universitete përdorin AI për përgatitjen e materialeve, aktivitetet e klasës dhe testet. Studentët, nga ana tjetër, përdorin AI-në për ndihmë në detyra, shkrime dhe marrje shënimesh.
Në përgjigje, universitetet po nxjerrin politika të reja për përdorimin e AI-së, duke kërkuar transparencë dhe aprovime paraprake. Në të njëjtën kohë, software për zbulimin e përmbajtjeve të krijuara nga AI po përmirësohet, por studentët po gjejnë mënyra për t’i shmangur ato, si duke futur gabime të qëllimshme në dokumente.
Ekspertët paralajmërojnë se përdorimi i tepruar i AI-së mund të dëmtojë aftësitë kritike të mendimit, duke e bërë të domosdoshëm një përdorim të kujdesshëm dhe të përgjegjshëm të teknologjisë./ Forbes
