Vendimet e gjykatave, jepen 3.8 milionë euro nga buxheti

Buxheti i shtetit ka paguar afro 3.8 milionë euro për vendime gjyqësore përgjatë vitit 2024. Referuar raportit të Monitorimit për Ministrinë e Financave, gjatë vitit që lamë pas, rezulton se në programin “Menaxhimi i të Ardhurave Tatimore”, janë 95 vendime gjyqësore të ekzekutuara” me kosto faktike 370.4 milionë lekë apo 3.8 milionë euro, ose në masën 80% të atyre që ishin planifikuar.

Kryesisht bëhet fjalë më së shumti për gjyqe të hapura dhe të fituara nga biznesi në lidhje me problematika të ndryshme si dhe nga punonjësit që kanë humbur vende pune, të konsideruara në mënyrë të padrejtë.

Sa i takon këtij programi, janë asistuar në 2024-ën  132,105 tatimpagues të  ose 77.5% e sasisë plan,  me një kosto faktike rreth 23 milionë euro si dhe janë kryer 4 906 “Inspektime, hetime tatimore” , me një kosto faktike prej 1 milionë euro.

Objektivi i programit “Menaxhimi i të Ardhurave Tatimore” është progresi organizativ i Administratës Tatimore dhe zhvillimi i kapaciteteve njerëzore, aplikimi i metodave dhe sistemeve të reja; modernizimi, ofrimi i shërbimeve cilësore dhe reduktimi i barrës administrative në pagesën e detyrimeve tatimore dhe kontributeve të sigurimeve shoqërore si rrjedhojë e rritjes së ndërgjegjësimit publik duke ndihmuar në zhvillimin e kulturës për përmbushje vullnetare më të lartë; Implementimi efikas i legjislacionit tatimor dhe sigurimeve shoqërore; hetimi i rasteve të mashtrimit tatimor; zbatimi i strategjisë së përmbushjes së menaxhimit të riskut; përmirësimi i mëtejshëm i kontrollit tatimor dhe gjurmimi i mashtrimeve tatimore; mbledhja efikase dhe efektive e borxhit.

Për vitin 2024, realizimi ishte në vlerën 27 milionë euro, ose 91 % e planit të rishikuar dhe 90% e planit fillestar.