LIGJET E BIZNESIT
Rritja e pagave kryesisht në sektorin publik, që është shoqëruar me shtim të pagesave të sigurimeve, si dhe rritja e cmimeve kanë mbushur buxhetin e shtetit. Banka e Shqipërisë ka konstatuar në Raportin e fundit të Politikës Monetare taksat që kanë ndikuar në rritjen me rreth 10.3% të të ardhurave buxhetore në 11 mujorin e vitit 2024.
“Për 11 muajt e parë të vitit, të ardhurat arritën në rreth 647 miliardë lekë, duke shënuar një rritje me 10.3% në terma vjetorë. Kontributin më të lartë në zgjerimin e të ardhurave, me rreth 3.5 pikë përqindje, e kanë dhënë të ardhurat me karakter jotatimor, si pasojë e arkëtimeve të fondeve nga ISSH-ja dhe nga transferimi i gjendjes së papërdorur të fondit të shpronësimeve në buxhetin e shtetit”, theksohet në raport.
Sipas BSH-së, zërat e tjerë që dhanë kontribut pozitiv në zgjerimin e të ardhurave përgjatë vitit 2024 ishin: të ardhurat nga sigurimet sociale, me 2.6 pikë përqindje, si pasojë e peshës së lartë që zënë në totalin e të ardhurave; të ardhurat nga TVSH-ja e brendshme dhe ajo mbi importin e mallrave, përkatësisht me 2 dhe 1.2 pikë përqindje; të ardhurat nga tatimi mbi të ardhurat personale, si pasojë e rritjes së pagave në sektorin publik e atë privat; dhe nga taksat lokale me 1.4 pikë përqindje. Të ardhurat nga TVSH-ja për 11 muajt e parë të vitit u zgjeruan me rreth 10.5% në terma vjetorë.
Banka e Shqipërisë vlerëson në analizën e saj se zgjerimi i shpejtë i të ardhurave nga TVSH-ja, krahas rritjes së importeve, i atribuohet dhe prodhimit të mallrave e shërbimeve në vend.
Suficiti buxhetor në fund të nëntorit ishte rreth 71.7 miliardë lekë, ose 3.1% e PBB-së, duke arritur nivelin më të lartë historik. Ndërkohë, deficiti i planifikuar për vitin 2024 ishte 57.3 miliardë lekë, që tregon se realizimi i planit kërkon një përqendrim të madh të shpenzimeve buxhetore gjatë muajit dhjetor.
