LIGJET E BIZNESIT
Shqipëria po përballet me probleme të forta demografike. Emigrimi I pandalshëm tashmë prej vitesh dhe plakja e popullsisë ka tkurrur numrin e lindjeve dhe ka shtuar numrin e vdekjeve.
Të dhënat e fundit të Institutit të Statistikave tregojnë se shtesa natyrore e popullsisë për tremujorin e tretë të vitit 2024 edhe pse rezultoi pozitive, regjistroi vetëm 752 lindje më shumë se sa vdekje.
“Numri i lindjeve për tremujorin e tretë 2024 është 6.495, duke shënuar një rënie me 0,3 %, krahasuar me tremujorin e tretë 2023. Numri i vdekjeve për tremujorin e tretë 2024 është 5.743, duke shënuar një rritje prej 7,6 %, krahasuar me tremujorin e tretë 2023”, vlerëson INSTAT.
Lindjet
Në tremujorin e tretë 2024, pesë qarqe të vendit shënojnë rritje të numrit të lindjeve, ndërsa shtatë qarqe të tjera shënojnë ulje të numrit të lindjeve, në krahasim me tremujorin e tretë 2023. Qarku me numrin më të lartë të lindjeve është Tirana me 2.438 lindje, ndërsa qarku me numrin më të ulët është Gjirokastra me 90 lindje.
Në tremujorin e tretë 2024, rritjen më të madhe në përqindje të lindjeve e ka qarku i Shkodrës me 12.0 %, ndërsa rënien më të madhe e ka qarku i Gjirokastrës me 23,7 %, në krahasim me tremujorin e tretë 2023.
Vdekjet
Në tremujorin e tretë 2024, dy qarqe të vendit shënojnë ulje të numrit të vdekjeve, ndërsa dhjetë qarqe të tjera shënojnë rritje, në krahasim me tremujorin e tretë 2023. Qarku me numrin më të ulët të vdekjeve është Kukësi me 141 vdekje, ndërsa qarku me numrin më të lartë është Tirana me 1.406 vdekje.
Në tremujorin e tretë 2024, rënien më të madhe në përqindje të vdekjeve e zë qarku i Dibrës me 5,7 %, ndërsa rritjen më të madhe e ka qarku i Fierit me 31,6 %, në krahasim me tremujorin e tretë 2023.
