Po sikur të kishit diçka që mund të bënit për ta ndihmuar fëmijën të ketë sukses në jetë, por nuk po e bëni ende? Bëhet fjalë për të ndihmuar fëmijën të bëhet më i fortë mendërisht, gjë që është e lehtë të neglizhohet me çdo gjë tjetër që kërkon vëmendjen prindërore. Por, është më thelbësore se kurrë, duke pasur parasysh që fëmijët përballen me frikë, ankth dhe shumë pengesa për fokusin dhe pozitivitetin.
Mund të ndihmoni fëmijët tuaj të zhvillojnë aftësi të forta në zgjidhjen e problemeve, rezistencë dhe një mendësi pozitive. Kjo nis duke forcuar qëndrueshmërinë e tyre mendore përmes këtyre gjashtë mënyrave.
1. Fëmijëve u pëlqen të pyesin ‘Pse?’ Jepini përgjigje kësaj pyetjeje
Nëse keni fëmijë, ka të ngjarë të keni duruar shumë “Pse?”, si pyetje: “Pse, mami?” “Pse duhet ta bëjmë këtë, babi?” “Por pse?” …
Merre atë frymë kureshtare dhe përdore mirë. Mësojini fëmijët të zgjidhin problemet duke përdorur qasjen analitike “Five Whys”, të krijuar nga shpikësi dhe industrialisti japonez Sakichi Toyoda, djali i të cilit themeloi prodhuesin e automjeteve Toyota.
Nxitni instinktin e fëmijës për të vazhduar të pyesë: “Pse?, derisa të arrijë në rrënjën e një problemi. Shpesh, shkaku rrënjësor shfaqet pasi është përsëritur pesë herë si pyetje. Supozoni se ata nuk kanë marrë “shpërblimin” e tyre për një detyrë të caktuar që u është dhënë, gjë që për ta përbën një shqetësim. Ndihmojini të analizojnë situatën si më poshtë, ndoshta duke e shndërruar në një lojë për më shumë angazhim:
- Pse nuk po merrni “shpërblimin” tuaj? Sepse nuk i lave enët siç thua se do t’i bësh.
- Pse nuk i lave enët? Sepse në vend të kësaj keni luajtur videolojëra.
- Pse po luanit videolojëra kur e dinit se nuk duhet të luanit? Sepse nuk i hoqët mënjanë. Ata ishin para televizorit, gati që të luanit.
- Pse nuk i hoqët mënjanë kur ju thashë? Sepse nuk po dëgjonit.
- Pse nuk po dëgjonit? Sepse ky është një zakon i keq me të cilin duhet të punoni.
Çështja është se zgjidhja e problemit fillon duke gërmuar në arsyen pse ndodhi një problem, në mënyrë që të mund të adresoni shkakun rrënjësor. Ndihmojeni fëmijën tuaj të krijojë këtë zakon kur ai analizon ndonjë problem dhe ju ndihmoni ata të bëhen më të fortë mendërisht.
2. Ndihmojini ata të përqendrohen te vërtetësia, jo te miratimi
Fëmijët kërkojnë miratimin e prindërve të tyre. Është e natyrshme. Por kërkimi i miratimit bëhet i pashëndetshëm kur kthehet në një kërkim të vazhdueshëm për vërtetim të jashtëm. Ndihmojini fëmijët të matin performancën e tyre kundrejt pritshmërive, në vend që të kërkojnë një vulë miratimi nga njerëzit e tjerë.
Në vend që të vlerësojnë nëse po arrijnë pritshmëritë e të tjerëve, inkurajojini të reflektojnë mbi: “A e arrita atë që kisha vendosur të bëja?” dhe “A po bëhem një version më i mirë i vetes time?”
3. Inkurajojini të marrin një perspektivë të shëndetshme ndaj rrjeteve sociale
Vendosja e kufizimeve se sa kohë duhet të shpenzojnë fëmijët në mediat sociale dhe sa kohë shpenzojnë vetë prindërit gjithashtu është e rëndësishme. Ndërsa flisni me fëmijët për mediat sociale që hasin, kujtojuni që të mos e krahasojnë jetën e tyre me atë të të tjerëve.
Ndihmojini të kuptojnë se ndikuesit shpesh postojnë përmbatje të përshtatura me kujdes që nuk pasqyrojnë jetën reale dhe se ata nuk duhet t’i përmbahen standardeve të pamundura që hasin. Nxitini ata që t’i shohin mediat sociale kryesisht si argëtim. Kjo mund të ndihmojë në parandalimin ose të paktën zbutjen e ndjenjave të pamjaftueshmërisë që mund të lindin.
4. Ndihmojini ata të përqëndrohen në procesin kundrejt rezultatit
Kur fëmijët fokusohen shumë në rezultatin e përpjekjeve të tyre, kjo mund të çojë në perfeksionizëm. Në vend të kësaj, mësojini ata të bien në dashuri me procesin.
Sidomos kur ata po hasin pengesa në përpjekjet e tyre, pyesni ata:
- “A po mësoni gjatë rrugës këtu?”
- “A po argëtoheni?”
- “A po rriteni dhe po përmirësoheni?”
Kjo është fitorja e vërtetë dhe duke i bërë këto pyetje, ju i ndihmoni ata të përqëndrohen në gjërat pozitive të rrugëtimit. Por, kjo nuk do të thotë se ata nuk duhet të përpiqen për një rezultat të madh.
5. Mos i lini të ngecin në ‘nuk është e drejtë’
Është e rëndësishme që fëmijët të mos bien në një mentalitet viktimë, gjë që mund t’i bëjë ata të ndihen dhe të veprojnë sikur janë të pafuqishëm. Këtu është një pyetje kyçe për t’u bërë atyre në raste të tilla: “A doni thjesht të ndryshojnë gjërat, apo doni t’i ndryshoni ato?”
E para është pasive dhe mund të shkaktojë periudha të zgjatura të zhytjes në kuptimin se “nuk është e drejtë”. Kjo e fundit është proaktive dhe ndihmon në shndërrimin e fëmijëve tuaj në liderë ndryshimi. Kjo mund të rrisë forcën e tyre mendore.
6. Ndihmojini të përqëndrohen në atë që mund të kontrollojnë
Një burim i madh ankthi për fëmijët mund të vijë nga shqetësimi për gjërat që nuk mund t’i ndryshojnë. Kërkojuni atyre të shkruajnë të gjitha gjërat për të cilat shqetësohen. Më pas kërkojuni të rrethojnë vetëm atë që mund të kontrollojnë dhe diskutoni me ta se si mund të bënin diçka për ato.
Forca mendore ka të bëjë shumë me vendosjen e energjisë tuaj aty ku ju shërben më së miri. Ky ndikon në uljen e shqetësimit të një fëmije dhe i ndihmon ata të msrrin energji për të ndërmarrë veprime që do të përmirësojnë rrethanat e tyre, gjë që mund të lehtësojë më tej shqetësimin e tyre./ cnbc.com
