Rreth 40% e buxhetit të një familje shqiptare shkon për t’u ushqyer. Të dhënat e fundit të Institutit të Statistikave mbi Anketën e Buxhetit të Njësive Ekonomike tregojnë se edhe brenda shpenzimeve për ushqime, shqiptarët paguajnë më shumë për mish dhe bukë dhe më pak për produktet e tjera ushqimore.
“Grupi “ushqime dhe pije jo-alkoolike”, me një vlerë mesatare mujore të shpenzimeve prej 36.349 lekë, i cili zë një peshë prej 39,6 % në buxhetin familjar. Nëngrupet me peshën më të madhe në shpenzimet për ushqim janë: “mish dhe nënprodukte” me 18,5%; “bukë dhe drithëra ” me 16,5 %; “perime” me 16,0%. Grupi i “shpenzime për banesën, ujë, energji elektrike dhe qira e paguar” me një vlerë mesatare mujore prej 8.904 lekë, përbën 9,7 % të totalit të buxhetit. Grupi “restorante dhe hotele”, me një vlerë mesatare mujore të shpenzimeve prej 6.755 lekë, zë 7,4 % të buxhetit gjithsej”, theksohet në raportin e INSTAT-it.
Të dhënat e detajuara tregojnë se në vitin 2023, shpenzimet për grupin “të tjera mallra dhe shërbime”, u rritën me 6,2 %. Kjo rritje erdhi kryesisht nga shpenzimet më të larta për “higjienë personale”, “trajtime estetike” dhe “shërbime parukerie dhe berber”.
Si pasojë, pesha e këtij grupi në shpenzimet mesatare mujore të NjEF është rritur. Shpenzimet për “pije alkoolike dhe duhan” u rritën me 5,6 %, krahasuar me vitin 2022, kryesisht për shkak të rritjes së shpenzimeve për “pije alkoolike” me rreth 8 %.
Shpenzimet për “mobilim, pajisje shtëpiake dhe mirëmbajtje të banesës” u rritën me 5,1 %, krahasuar me vitin e kaluar. Kjo rritje erdhi nga shpenzimet më të larta për “shërbime periodike” (pastrues, kopshtar, etj.), “blerje pajisjesh për gatim” dhe “riparime të ndryshme në familje”. Shpenzimet mesatare mujore për konsum sipas qarqeve, 2023
Në vitin 2023, njësitë ekonomike familjare të qarkut Tiranë, shpenzojnë më shumë për konsum, mesatarisht 108.098 lekë në muaj. Qarqet e tjera me shpenzime të larta mujore për konsum janë Korça me 91.034 lekë dhe Durrësi me 89.561 lekë.
Ndërsa qarqet me shpenzimet mesatare më të ulëta mujore për konsum janë Kukësi me 73.225 lekë dhe Dibra me 74.479 lekë.
