Protesta e blegtorëve, Autoriteti i Konkurrencës po heton fabrikat e qumështit

Teksa blegtorët vijojnë protestat e tyre kundër uljes së çmimit të qumështit nga përpunuesit, Autoriteti i Konkurrencës ka njoftuar se ka nisur hetimin e thelluar ndaj tyre. Kreu i këtij institucioni, Denar Biba ka takuar në protestë blegtorët, ku është njohur me pretendimet e tyre lidhur me uljen e çmimit të qumështit nga fabrikat përpunuese, ulje kjo e cila sipas blegtorëve, tregon për një situatë konkurrence jo të drejtë dhe që ka sjellë krizë financiare duke detyruar disa prej tyre të mbyllin bizneset.

Autoriteti i Konkurrencës, aktualisht, nëpërmjet vendimit nr. 1045, datë 29.12.2023 e ka vënë nën hetim të thelluar tregun e prodhimit dhe shitjes me shumicë të nënprodukteve të qumështit për ndërmarrjet Erzeni shpk, Gjirofarma sh.a, ADG shpk, (Lufra) dhe SHAKA Boboshtice shpk.

“Nëpërmjet këtij hetimi, por dhe dëgjesave me palët e interesuara dhe të prekura nga kjo situatë, Autoriteti i Konkurrencës do të evidentojë nëse ka apo jo shenja të kufizimit, shtrembërimit apo pengimit të konkurrencës dhe në rast konstatimi të shkeljeve do të marrë masat përkatëse në përputhje me parashikimet e ligjit nr. 9121 dt. 28.07.2003 “Për mbrojtjen e konkurrencës”, theksohet në njoftimin për shtyp të Autoritetit të Konkurrencës.