Ekspertja e financave: Arsyet që rritën sasinë e euros në qarkullim

E ftuar në emisionin “A2 Bussines” nga Aurora Sulçe, Brunilda Isaj, eksperte për financat personale, teksa u pyet se përse kemi kaq shumë euro në qarkullim dhe se cilat janë burimet, ajo u shpreh se sasia e monedhës EURO në qarkullim ka qenë prezentë gjatë gjithë vitit, duke ushtruar presion mbi kursin, sidomos në pikun sezonal, që kulmon me periudhat e gushtit dhe dhjetorit.

Isaj përmendi gjithashtu edhe faktin e hyrjeve shtesë sikurse janë remitancat që sjellin emigrantët shqiptarë që jetojnë e punojnë jashtë shtetit. Gjithashtu, përmendi edhe turistët e huaj, që vizitojnë vendin tonë.

“Nëse do ta shohim në një tendencë vjetore, sasia e EURO-ve në qarkullim ka qenë prezente gjatë gjithë këtij viti dhe ka ushtruar presion mbi kursin e EURO-s, sidomos në pikun sezonal, që janë periudhat gusht apo dhjetor. Kemi edhe hyrjet shtesë siç janë remitancat që sjellin emigrantët shqiptarë nga jashtë në vendin tonë dhe turistët e huaj. Duhet pranuar që në vijimësi kemi hyrje të larta të monedhës EURO, kryesisht nga remitancat, referuar burimeve zyrtare, dhe nga aktiviteti, i cili në një farë mënyre e inkurajon tërheqjen e EURO-s në vendin tonë. Dhe ky është njëri nga faktorët, ai që është i matshëm, por që sigurisht kemi edhe shumë qarkullim EURO edhe jashtë bankave, pra në kanale informale, të cilat janë të vështira për t’u matur dhe për t’u kuantifikuar për të llogaritur më pas se cili do të jetë impakti i tyre individual. Në rastet që flasim nuk shohim ndonjë kërkesë të madhe për blerjen e euros”, ka shpjeguar ekspertja Isaj.