Eksportet po ndjejnë krizën, në shtator ngadalësohet ndjeshëm ritmi i rritjes

Ngadalësohet ritmet e rritjes së eksporteve. Pas një kapërcimi të fortë, pas periudhës së pandemisë, produktet shqiptare me destinacion tregjet e huaja po përballen me disa probleme, si pasojat e krizës globale dhe kostove të larta të energjisë, por edhe ndërprerjen e përkohshme të aktivitetit nga dy sipërmarrje të mëdha, Kurum dhe Albchrome.

Sipas të dhënave të Institutit të Statistikave, në shtator, eksportet u rritën me 16.3%, që është norma e rritjes më e ulët e këtij viti. Në gusht eksportet u rritën me 48.1%.

Peshën kryesore në rritjen e eksporteve në shtator e mbajtën tekstilet e këpucët, ndërsa për herë të parë që nga pandemia shënuan tkurrje shitjet e materialeve të ndërtimit e metaleve, që deri tani kishin qenë një nga nxitësit kryesorë të eksporteve.

Sipas INSTAT, Në Shtator 2022 eksportet e mallrave arritën vlerën 39 miliardë lekë, duke u rritur me 16.3 %, në krahasim me të njëjtën periudhë të një viti më parë dhe me 9.5 %, në krahasim me gushtin 2022. Në këtë nëntëmujor eksportet e mallrave arritën vlerën 366 miliardë lekë, duke u rritur me 37.9 %, nga 41% që kishte qenë rritja për 8 mujorin.

Gjatë muajit shtator, në rritjen e eksporteve prej 16.3 %, pozitivisht kanë ndikuar grupet: “Tekstile dhe këpucë” me 5.8% rritje; “Minerale, lëndë djegëse dhe energji elektrike” me 5.2% rritje dhe “Makineri, pajisje dhe pjesë këmbimi” me 3%. Ndërsa negativisht kanë ndikuar grupet “Materiale ndërtimi dhe metale” me -1.3% dhe “Lëkurë dhe artikuj prej tyre” me -0.01%.  Për 9 mujorin, grupet që kanë ndikuar pozitivisht në rritjen vjetore të eksporteve janë: “Minerale, lëndë djegëse dhe energji elektrike” me +11.1%; “Materiale ndërtimi dhe metale” me 10.9 % dhe “Tekstile dhe këpucë” me 6.6 %.