LIGJET E BIZNESIT
Emisioni A2 Business i gazetares Aurora Sulçe ka analizuar efektet e reformës administrative territoriale, që ka hyrë në fuqi në 2015-ën. Një analizë që ka munguar nga institucionet shtetërore, ndërsa partitë politike po diskutojnë prej muajsh tashmë shtimin e numrit të bahskive, në prag të zgjedhjeve vendore të rradhës. I ftuar në studio, deputeti demokrat Xhelal Mziu, anëtar i Komisionit parlamentar për Reformën Administrative, ka treguar arsyet që kanë çuar në falimentimin e disa bashkive kryesore të vendit.
Sipas Mziut, rritja e të punësuarve, liberalizmi i çmimit të energjisë për ujësjellësat dhe ndryshimi i paketës fiskale për biznesin e vogël kanë ndryshuar drejtpërdrejt në buxhetin e disa njësive vendore, duke iu krijuar situata të vështira.
Në rastin e bërjes zero të taksave për biznesin e vogël, Mziu shprehet se qeveria të paktën duhet të kishte bërë një kompensim për bashkitë
“Shifra 12 miliardë e trashëguar nga 2015 nuk është e paguar e gjitha. Ka qenë ujësjellësi dhe qeveria që ka bërë një falje. Në dy vitet e fundit kemi një rritje të borxhit. Nuk janë të përfshira faturat e pa likuiduara. Nëse më parë kishe një limit, sot kemi fatura të mëdha të pa likuiduara. Është rritur pa limit numri i të punësuarve, liberalizimi i çmimit të energjisë për ujësjellësit dhe në këto vite qeveria ka ndryshuar paketën fiskale për biznesin e vogël. Kjo gjë e ka çorientuar biznesin dhe ka futur duart ke buxheti i bashkive të vogla. Qeveria duhet të bënte kompensim për këtë taksë”, tha Mziu.
