Situatë e rrezikshme, Meta thërret në zyrë drejtorin e burgjeve

Presidenti i vendit, Ilir Meta ka thirrur në zyrë drejtorin e Përgjithshëm të Burgjeve, Agim Ismaili për t’i kërkuar llogari për gjendjen e sigurisë në burgjet shqiptare për t’i paraprirë çdo situatë të pakëndshme.

Burimet konfirmojnë për “Balkanweb” se kjo kërkesë e Presidentit vjen në një kohë, të cilën ai e vlerëson si tepër të tensionuar.

Kreu i Shtetit kërkon ndër të tjera të merren të gjitha masat për një siguri sa më maksimale në burgjet e vendit. Kujtojmë që prej dy ditësh ka pasur tensione dhe përplasje mes Policisë së Shtetit dhe asaj Bashkiake në disa qytete ku Bashkitë drejtohen nga e djathta.

Me urdhër të kryebashkiakëve të djathtë, policët bashkiakë nuk lejojnë futjen e materialeve zgjedhore në KZAZ-të e ngritura për zgjedhjet e 30 qershorit, duke zbatuar kështu dekretin e Presidentit Meta për anulimin e 30 qershorit si datën e zgjedhjeve vendore.

Nga ana tjetër Policia e Shtetit është vënë në ruajtje të materialeve zgjedhore dhe është e gatshme të mos i lëvizë ato që aty, duke zbatuar kështu vendimin e KQZ-së për të mos e njohur dekretin e Presidentit dhe vijimin e përgatitjeve për zgjedhjet, të cilat siç qeveria pretendon, duhet të mbahen më 30 Qershor, që të jenë në frymën e Kushtetutës.

Policët bashkiakë mbështeten nga ana tjetër edhe nga simpatizantë e përfaqësues të opozitës, të cilët mbrëmjen e djeshme i vunë flakën një KZAZ-je të ngritur në Shkodër, ku u dogjën materialet zgjedhore. E njëjta situatë është paraqitur edhe sot në Burrel./balkanweb