Ditët e fundit në mbarë vendin ka patur konfrontime mes policisë lokalë të disa qyteteve dhe asaj të rendit.
Në bazë të këtyre ngjarjeve ministri i brendshëm Sandër Lleshaj në një deklaratë për shtyp u shpreh se tashmë është marrë vendimi për të shkrirë strukturat e policisë së këtyre bashkive.
Lleshaj shprehet se policitë bashkiake që drejtohen nga opozita po dalin hapur kundër ligjit.
“Do të ndeshen me të gjithë forcën e ligjit. Policia e shtetit po sulmohet në mënyrë të organizuar po përgjigjet dhe do të përgjigjet me vendosmëri deri në fund. Kryesisht punonjës bashkish, por më keq punonjës të policive bashkiake po gabojnë rëndë duke u përdorur si mish për top. U bëj thirrje punonjësve që mos marrin mbi vete barra të rënda duke kryer vepra të rënda për llogari të një grushti njerëzish që duan të marrin peng zgjedhjet. Qeveria do të marrë masat e menjëhershme që të shkrijë disa struktura të policisë bashkiake që kanë dalë haptazi kundër ligjit. Ndoshta kjo mund të jetë pak. U përcjell qytetarëve mesazhin se e gjithë kjo shfaqje nuk do të cënojë aspak rendin dhe sigurine tyre. Policia është në krye të detyrës dhe pavarësisht situatës nuk do të cedojë asnjë milimetër nga përgjegjësia e saj. U bëj apel prokurorëve dhe gjykatëse të këtyre territoreve që të zbatojnë ligjin. Policia e shtetit do të arrestojë çdo shkelës. Ky është një moment kritik në betejën e ligjit me antiligjin. Në këtë moment ligji, shteti dhe shoqëria duhet të jenë bashkë. Kryetarë bashkish që po u përfundon mandati nuk mund të qendrojnë me dhunë”, tha Lleshaj.
