Shpallet në kërkim ish-deputeti i PD Bardh Spahia

Pas ngjarjes së djeshme në Shkodër, ku mbështetës të Partisë Demokratike i kanë vënë flakën materialeve të votimit që ndodheshin në shkollën “Sejnza Juka”, policia ka shpallur në kërkim ish-deputetin demokrat Bardh Spahia.

Policia njofton se për këtë ngjarje janë arrestuar 5 persona si dhe janë shpallur në kërkim 14 të tjerë dhe janë proceduar 2 persona në gjendje të lirë.

NJOFTIMI ZYRTAR I POLICISE

Pas identifikimit të personave me anë të pamjeve filmike dhe fotografike të administruara nga policia, bënë arrestimin në flagrancë të 5 personave, konkretisht:

1. B., 29 vjeç, banues në lagjen “Ajasëm”, Shkodër
2. N., 41 vjeç, banues ne lagjen “Guerrile”, Shkodër, punonjës i Policisë së Bashkisë Shkodër
3. G., 50 vjeç, banues në lagjen “Salo Halili”, Shkodër
4. N., 39 vjeç, banues në Velipojë, Shkodër
5. Th., 17 vjeç, banues në Shkodër

Janë shpallur në kërkim policor 14 shtetas dhe janë proceduar 2 të tjerë të cilët ndiqen në gjendje të lirë.

Materialet iu referuan Prokurorisë së Rrethit Gjyqësor Shkodër për veprat penale “Shkatërrimi i pronës me zjarr”, ”Dëmtimi me dashje i materialeve zgjedhore”, “Kundërshtimi i Punonjësit të Policisë së Rendit publik”, “Goditja për shkak të detyrës”, “Kanosja për shkak të detyrës” dhe “Mosbindja ndaj urdhrit të Policisë së Rendit publik”.