“I bën dëm Shqipërisë” Situata në FSHF, flet Agron Duka: Nuk është mirë që merren me njerëz që janë pjesë e politikës

Kreu i Partisë Agrare Ambientaliste Agron Duka ka deklaruar në lidhje me situatën në FSHF se nuk është rrugë normale që ky institucion të merret me njerëz që janë të politikës.

Duke folur sot për mediat, ai tha se vendosja e lëndës shpërthyese në derën e të vëllait, Armand Duka, nuk është vepër e Veliajt, por që sipas tij një klimë e tillë e tillë e acaruar mund të çojë në situate të tilla.

Ndërhyrjen e kryebashkiakut Erion Veliaj te zgjedhjet e Federatës ai e quan terësisht politike dhe dëmtuese.

Pjesë nga intervista:

-Si e komentoni situatën e FSHF-së?

Duka: Nuk mendoj se është një rrugë normale që institucioni i Federatës të merret me njerëz që kanë lidhje me politikën.

Pavarësisht se ai rreket e thotë se jam aksioner në klubin Tirana por duket që ndërhyrja është politike.

Gjuha e përdorur nga ana e tij ka qenë e pabazë dhe subfrontal ndaj bizneseve tona. Vendosja e lëndës eksplozive në derën e tim vëllai nuk besoj se është orkestruar nga Veliaj por gjithsesi një klimë e tillë e acaruar mund të derivojë ngjarje të tilla, siç ndodhi me eksplozivin.

Nëse makineria shtetërore angazhohet me të gjitha forcat për të ndërhyrë në zgjedhjet e Federatës, nuk i bën dëm vetëm komunitetit të futbollit por i bën dëm Shqipërisë.

Duhet ta pranojmë që federatat nuk varen nga qeveria por nga FIFA dhe UEFA dhe janë shumë sensibël këto çështje. Mendoj se kjo është një luftë e humbur, gjuha e arsyes do ishte vota.