Reshjet e dendura të borës shkaktuan probleme zinxhir në Greqi si me fluturimet e anuluara ashtu edhe me mbylljen e autostradës Attiki Odos. Njerëz të të gjitha moshave, familje me foshnja, fëmijë dhe të moshuar u detyruan të kalonin natën në aeroport pasi asnjë nga zyrtarët nuk u kujdes për të mbajtur të hapura rrugët që të çojnë në aeroportin më të madh ndërkombëtar në Greqi.
Një situatë e paprecedentë është përjetuar që në mëngjes nga ata që tentuan të hynin në Attiki Odos për të shkuar në punë apo për në shtëpi, pasi moti i keq dhe i mbajti të bllokuar në makinat e tyre për shumë orë.
Attiki Odos në një komunikatë tha se problemet intensive të trafikut janë krijuar për shkak të mjeteve të bllokuara ose për shkak të defekteve mekanike, por po ashtu edhe frikës dhe mungesës së përvojës së drejtuesve, si pasojë e të cilave ata kanë “ngecur” në radhët e kilometrave dhe borëpastrueset.
Qindra drejtues mjetesh u ndodhën në një situatë të paprecedentë, pasi mbetën të bllokuar në vend pa ujë dhe ushqim. Ata që kishin karburant të mjaftueshëm i mbanin motorët të ndezur për t’u ngrohur, ndërsa të tjerët vendosën të braktisnin automjetet e tyre dhe të hynin në Hekurudhën Suburbane për të dalë nga trafiku dhe për t’u larguar nga stacioni i Kantzës. Derisa efektivët e Forcave të Armatosura ndërhynë për të zhbllokuar situatën.
Kryeministri grek kërkoi dëmshpërblim prej 2000 euro për çdo automjet të bllokuar në autostradë nga “Attiki Odos”. Pas kaosit të shkaktuar dje nga moti i keq, Kyriakos Mitsotakis kërkoi dëmshpërblim për mbi 3000 persona që kaluan orë tmerri në rrugën kryesore.
