Ish-deputeti socialist Spartak Braho tha në News 24 se personat të cilat ndjekin nga pas ish-kryeministrin Berisha janë të droguar dhe të pirë në kuptimin politik të fjalës.
Braho tha se Berisha simbolizon një politikan që dhunon dhe eliminon kundërshtarët e tij politik.
“Ajo histori ka mbaruar, por ky është Berisha. Ambasadorja e quajti “Spin doctor”, njeri fantazist që krijon situata të paqëna. Mjerë ata që e ndjekin pas, shoh aty që e ndjekin njerëz të pirë, të droguar, në kuptimin mental të fjalës. Berisha duhet të zhduket nga faqja e dheut politikisht në Shqipëri. Nuk duhet të marrë pjesë në politikën në Shqipëri. Revolucionet nuk i bën dot Sali Berisha.
Këtë revolucion as nuk e ka filluar as nuk do ta çojë deri në fund. Revolucionet nuk bëhen me filozofinë e Berishizmit. Është një filozofi e tejkaluar, është një kopje e shëmtuar e filozofit nazist Carl Schmitt, pararendësit të ardhjes në fuqi të Hitlerit në Gjermani, është bashkimi i dhunës dhe të konsideruarit të kundërshtarit armik. Këtë bëri në 92-93-shin me Fatos Nanon, këtë bëri në 96-ën me deputetët socialistë, këtë bëri më 21 janar. Ky është Berisha që kundërshtarët o i vret, o i dhunon, o i eleminon”, tha Braho.
