Pas fillimit të punimeve për ndërtimin e Bazës Ajrore të NATO-s në Kuçovë, ka reaguar ish-ministri Sandër Lleshaj.
Ai e quan këtë zhvillim një lajm me shumë rëndësi.
REAGIMI I PLOTE
NATO NË SHQIPËRI
Fillimi i punimeve për ndërtimin e Bazës Ajrore të NATO-s në Kuçovë është një lajm me shumë rëndësi.
Prania fizike e NATO-s në Shqipëri, dhe pikërisht në qytetin që për shumë vite mbajti dhunshëm emrin e Stalinit, diktatorit që ishte armiku numër një i Aleancës Atlantike, ka një domethënie që i tejkalon kufijtë e vetë Shqipërisë, por edhe një simbolikë të rëndësishme.
NATO tashmë është realisht e pranishme në Shqipëri me bazën e saj ajrore. SHBA do të jenë së shpejti të pranishëm me një shtab të përparuar të Komandës së Operacioneve Speciale.
Pas pranisë ajrore dhe tokësore, mendoj se së shpejti do të lindë nevoja edhe për një prani detare, duke kompletuar kështu angazhimin në të tri dimensionet: tokësore, ajrore dhe detare.
Një bazë detare, do të ishte një investim tjetër me rëndësi strategjike që, jo vetëm do t’i jepte një vlerë të shumfishuar pozitës gjeografike të Shqipërisë, si nje vend me profil të qartë maritim, por do të shumëfishonte edhe efektin e investimeve të SHBA dhe të NATO-s në dimesionin tokësor dhe ajror.
Zoti i ka falur Shqipërisë një pozitë gjeografike të jashtëzakonshme, si vend me akses të rëndësishëm në det dhe si porta natyrale e Ballkanit, dhe shqiptarëve vlera, orientim dhe qëndrim të fortë perendimor.
Të dy këto mjaftojnë për të shpresuar se procesi i integrimit perendimor të vërtetë të Shqipërisë dhe shqiptarëve do të thellohet me shpejtësi.
