Policia ka proceduar penalisht tre tifozë, të cilët gjatë ndeshjes Tirana – Vllaznia të zhvilluar një ditë më parë në “Air Albania” kanë hedhur lëndë piroteknike në fushë dhe kanë thyer stolat e stadiumit.
Bëhet me dijes e janë proceduar shtetasit me iniciale A. F., 26 vjeç, B. K., 33 vjeç dhe E. S., 26 vjeç, teksa policia po punon për identifikimin dhe shoqërimin e personave të tjerë që kanë ushtruar aktivitete të dhunshme gjatë ndeshjes.
Përmendim që se në pushimin mes pjesëve tifozët e Tiranës dhe ata të Vllaznisë u përplasën mes tyre, ku u përdorën edhe fikëse zjarri dhe sende të tjera të forta.
Njoftimi i Policisë:
Specialistët për Hetimin e Krimeve në Komisariatin e Policisë Nr. 1, në vijim të veprimeve hetimore për situatën e krijuar gjatë dhe pas ndeshjes Tirana-Vllaznia të zhvilluar mbrëmjen e djeshme në stadiumin “Air Albania”, bënë identifikimin, shoqërimin dhe proceduan penalisht shtetasit, të cilët gjatë ndeshjes hodhën flakadanë në fushë dhe pas përfundimit të saj ushtruan veprime të dhunshme, duke dëmtuar stolat e stadiumit.
Nga shërbimet e Policisë u proceduan penalisht shtetasit A. F., 26 vjeç, B. K., 33 vjeç dhe E. S., 26 vjeç, pasi gjatë zhvillimit të ndeshjes kanë kryer veprime të kundraligjshme duke ndezur flakadanë, hedhur lëndë piroteknike në fushë, thyer stola.
Vijojnë veprimet hetimore për dokumentimin e plotë të këtij rasti, identifikimin dhe shoqërimin e personave të tjerë që kanë ushtruar veprime të dhunshme gjatë aktivitetit sportiv.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
