Alfred Rushaj nuk do të jetë në krye të grupit parlamentar të Partisë Demokratike dhe as nënkryetar i kësaj force politike.
Lajmin e dha sot lideri Lulzim Basha gjatë një mbledhjeje të Këshillit Kombëtar, ku Rushaj nuk ishte i pranishëm.
Basha bëri dhe disa lëvizje të tjera në përfaqësimin e PD në Kuvend, por largimi i Rushajt ishte e papritura e madhe në selinë blu.
Vendimi për të lënë këto funksione ka qenë i vetë Rushajt dhe me gjasë ato lidhen me çarjen e grupit që ai drejton pas krizes se brendshme në PD dhe përjashtimit nga ky grup të disa deputetëve.
Deri tani vetë ish kreu i grupit parlamentar, qe nuk ka qenë në këtë mbledhje për arsye shëndetësore, nuk ka bërë asnjë koment dhe mesa duket vendimi i tij për tu larguar ka te bëjë vetëm me postin drejtues që kishte. Deklarata e Bashës la të kuptohet që ky vendim është marrë në një dakortësi mes të dyve. Në vend të Rushajt, Basha caktoi një prej ‘skiftereve’ te tij në betejën e brendshme në PD, Enkeled Alibeajn.
