Futbolli shqiptar në zi/ Ndahet nga jeta lojtari legjendë i Vllaznisë

Një lajm i hidhur vjen për futbollin shqiptar.

Mësohet se është ndarë nga jeta lojtari legjendë i Vllaznisë, Ramazan Rragami.

Ai vuante prej kohësh nga një sëmundje e rëndë, por nuk ka mundur të mbijetojë duke mbyllur sytë përgjithmonë në moshën 77-vjeçare.

Rragami ka një jetë të mbushur me suksese në futboll, ndërsa do të mbahet mend edhe si lojtari që detyriu UEFA-n që të vendosë një rregull të ri për gjuajten e penalltive: “Një futbollist nuk mund të gjuajë më shumë se një goditje”.

Çfarë ndodhi?

Plot 46 vite më parë luhej finalja e Kupës së Shqipërisë, Vllaznia-Besa, më saktë ndeshja e kthimit, pasi bëhej me dy takime.

Fundi i kësaj finaleje mbart në vetvete edhe një ndryshim rrënjësor në futbollin evropian që doli pikërisht nga ky takim. Takimi i parë në Kavajë kishte përfunduar 2-0 për vendësit dhe po aq përfundoi edhe ndeshja e kthimit në Shkodër. Vendësit arritën të kthenin gjithçka falë dy penalltive të kthyera në gol nga Ramazan Rragami.

Kështu, takimi shkoi në shtesë dhe më pas sërish te pika e bardhë e 11-metërshave. Për Vllazninë, te pika e bardhë u afrua për pesë herë radhazi sërish Ramazan Rragami, duke shënuar që të pesta goditjet e bëra. Ndërsa nga ana tjetër, kavajasit arritën të shënonin vetëm tri penallti me Nimet Merhorin, pasi e fundit nuk u gjuajt fare (për shkak e nuk vlente më) sepse njëra prej tyre ishte pritur mjeshtërisht nga ish-legjenda e portës kuqeblu, Paulin Ndoja.

Nuk kishte ndodhur kurrë më parë në futbollin botëror që një lojtar të gjuante të gjitha penalltitë (atëherë nuk ekzistonte rregulli që një lojtar duhet të gjuajë vetëm një penallti) dhe ky fakt bëri aq bujë, sa UEFA vendosi të ndryshojë rregullin e gjuajtjes së penalltive nga i njëjti person.

Deri në atë vit, kur ndeshja shkonte drejt penalltive, ishte rregull që 5 penalltitë e një ekipi i gjuante vetëm një lojtar. Rragami me saktësinë e tij bëri që gjërat të ndryshojnë. Rregulli i ri që u vendos më pas nga institucioni i futbollit evropian, bëri që 11-metërshat të ekzekutoheshin nga pesë futbollistë të ndryshëm. Bëhet fjalë vetëm për penalltitë pas kohës së rregullt dhe shtesës.