LIGJET E BIZNESIT
Në Shqipëri policia ka paditur në prokurori ish-deputetin e Myslim Murrizi për fshehje të pasurisë, transaksione dhe depozitime të dyshimta parash, me qëllim pastrimin e tyre.
Ish-deputeti Myslim Murrizi dhe familjarët e tij, thuhet në kallëzimin e policisë, kanë kryer transaksione të dyshimta në vlera afro 734 mijë euro, vetë dhe përmes subjekteve që zotërojnë, në disa banka.
Veprimet e dyshimta bankare në shuma të konsiderueshme janë kryer gjatë një periudhe 13-vjeçare nga dhjetori 2008 deri në qershor 2021.
“Këto veprime financiare janë kryer nga vet zoti Murrizi, nga persona të tretë, kalime të hollash mes llogarive të shtetasit, kalime në favor të subjektit të administruar prej tij, ‘Murrizi 2009’ dhe tërheqje cash” – thuhet në dokumentet e paraqitura nga policia.
Në dokumente përshkruhen veprime të dyshimta bankare për blerjen e një automjeti 8 vjet më parë 78 mijë euro në favor të një subjekti, transferta dhe kreditime prej 515 mijë euro si dhe këste kredie mijëra euro për blerje apartamenti.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Një seri veprimesh të dyshimta janë kryer në një tjetër llogari bankare sërish për blerje automjeti dhe apartamenti në shuma dhjetëra mijëra euro, ku depozitojnë cash familjarë të ish-deputetit Murrizi në favor të tij.
“Këmbime valutore, kalime nga/për të tretë me qëllim likuidim detyrimesh, shitblerje pasurish të paluajtshme, tërheqje në cash”, përshkruan policia një larmi veprimesh bankare të dyshimta me dhjetëra mijëra euro, të cilat kalojnë në përfitim të ish-deputetit Murrizi, herë si ortak, herë si kthim kontributesh, duke tërhequr vëmendjen e policisë për hapa të paligjshme, që duhen hetuar.
Ish-deputeti Murrizi i ka hedhur poshtë akuzat në mediat vendase, duke kujtuar se pasuria e tij është e deklaruar dhe se dokumentet janë në Inspektoratin e Lartë të Deklarimit dhe Kontrollit të Pasurive.
Zoti Murrizi ka theksuar se ka qenë dhe mbetet i hapur ndaj drejtësisë, ku në ngjarje të viteve më parë ka marrë pafajësi nga gjykata.
Denoncimi prej shumë faqesh i policisë është tashmë në zyrat e prokurorisë, e cila pritet të thotë fjalën e saj.
