Ish-ministri i Brendshëm Saimir Tahiri është paraqitur në GJKKO për të nisur seancën me trupën e re gjykuese. Seanca është shtyrë për në 17 janar ora 11:00, për shkak se gjyqtari Florian Kalaja kërkoi kohë për t’u njohur me çështjen. Ai mori dosjen në dorë pas dorëheqjes së Daniela Shirkës një ditë më parë.
Jashtë dyerve të gjykatës avokati Haxhia tha se do të presin shqyrtimin e kërkesës në lidhje me gjyqtaren Shirka, ndërkohë që një mesazh e pati edhe për organet e vettingut, duke deklaruar se sot jemi në kushtet kur atyre u zgjatet mandati, sepse duan të shkojnë me pushime ndërsa fatura mbetet në kurriz të popullit.
“Sipas procedurë kërkesa u paraqit në gjykatë për të parë se cili është shkaku. Është bërë kërkesë për të mos qenë prezente gjyqtarja Shirka. Presim që gjykata të na vërë në dijeni shkakun. Nëse shkaku do jetë i njëjtë me atë që ne kemi kërkuar.
Nëse kemi ndërtuar një gjykatë, ajo është specializuar dhe ka autoritetin për të gjykuar subjekte të tilla. Por kjo është situate në sistemin në drejtësi ashtu si është edhe harta gjyqësore. Është e pajustifikueshme që një komision i lartë i zgjatet vettingu dhe nuk punojnë për shkojnë me pushime në vend që gjithë verës të merreshin me dosjet dhe fatura shkon në kurriz të popullit”, u shpreh Haxhia.
Shirka është e treta gjyqtare e cila tërhiqet nga çështja penale ndaj Tahirit dhe ish-drejtorit të Policisë së Vlorës, Jaeld Çelës, me argumentin se është në papajtueshmëri. Më herët kanë dhënë dorëheqjen Miliana Muça dhe Ilirjan Olldashi.
