Burri denoncon zhdukjen e gruas, gjendet trupi i 48-vjeçares

Trupi i pajetë i një 48-vjeçarje paraditen e të shtunës është gjetur në një grykë në fshatin Mashqerraj të Malësisë së Madhe.

Efektivët e forcave RENEA dhe të FNSH-së Shkodër, arritën të futeshin në vendin ku dyshohej se ishte vetëhedhur shtetasja me iniciale Sh.H., duke mundësuar jo vetëm gjetjen  e trupit por edhe nxjerrjen e tij nga vendi ku ishte hedhur.

Policia tha se gruaja ishte larguar nga banesa në mëngjesin e 24 dhjetorit dhe nuk ishte kthyer më. Bashkëshorti i saj, ka lajmëruar fillimisht policinë e zonës.

Efektivët e komisariatit të Malësisë së Madhe në bashkëpunim me policinë e Shkodrës, nisën kërkimet për gjetjen e saj.

Si rezultat i informacioneve të marra në rrugë operative dhe pas kontrolleve në territorin e fshatit Mashqerraj në afërsi të një gryke (shpellë) u zbuluan telefoni i saj dhe një fletore.

Për shkak se terreni ishte i vështirë, efektivët e policisë lokale e patën të pamundur të zbulonin trupin e saj dhe për këtë arsye kërkimet u ndërprenë, pasi pritej që në orët e para të së shtunës, të mbërrinin në zonë forcat RENEA dhe trupat e FNSH-së të Shkodrës, që siç u hamendësua fillimisht nga policia lokale arritën të zbulonin dhe ta nxjerrin nga aty trupin e pajetë të 48-vjeçares.

Po punohet për të sqaruar me detaje motivet e kësaj ngjarjeje.