LIGJET E BIZNESIT
Nga Kuvendi Kombëtar i Partisë Demokratike Fatbardh Kadilli deklaroi se kjo forcë politike ndodhet në prag të ndarjes dhe se ka vetëm një mundësi që kjo të shmanget.
Sipas tij, Lulzim Basha duhet të japë dorëheqjen dhe Sali Berisha të mos kandidojë më për kreun e PD.
Kadilli foli me kritika, teksa theksoi se kriza në PD nuk nisi më 9 shtator, por që më 26 prill, kur Lulzim Basha vendosi të mos japë dorëheqjen pas humbjes në zgjedhje.
“Të dashur delegatë do kërkoja të imagjinonim për një moment një vend në botë ku ka votime që partia humbet zgjedhjet për 4 herë rresht. Imagjinoni një parti që ka dështuar në shumë aksione, që nuk gjen asnjë të metë në humbjet e saj po fajëson kundërshtarin diabolik. Imagjinoni që dhe pas humbjes së katër udhëheqësi nuk jep dorëheqjen, por vazhdon sikur s’ka ndodhur asgjë. Çfarë do mendonit për atë vend. Imagjinoni përsëri që në këtë parti plas një konflikt i brendshëm dhe i kërkohet udhëheqësit të japë dorëheqjen.
Ju keni një kohë jo të vogël që gëlltisni gënjeshtra, iluzione. Iluzioni i parë se kriza nisi më 9 shtator. I keni harruar të gjitha ditët, muajt javët, betejat për të cilat konflikti ishte brenda. Lëvizja e Sali Berishës ndezi vetëm fitilin. Nëse duhet një datë për ngjarjen që e bëri krizën 4e PD të pashmangshme është data 26 prill, kur Lulzim Basha vendosi të mos japë dorëheqjen, por shpalli se do të vazhdojë të jetë në krye të PD”, tha Kadilli.
Ai theksoi se më 26 prill PD vendosi të jetë një parti e vogël. “Më 26 prill PD dhe Basha shpallën se do të fitojnë duke mos ndryshuar asgjë. Kjo është gënjeshtra e dytë. Shkaku i krizës sonë është mosndryshimi. PD ka nevojë për ndryshim të thellë. Ju keni rezistuar ndaj çdo ideje të ndryshimit. Ju mund të jeni të pavetëdijshëm, dhe të besoni se bëtë sot historinë, por realiteti është që PD ndodhet në prag të ndarjes. Ka një realitet sot dhe në datën 11, kush e mohon ka vënë perde. Ka vetëm një mundësi që kjo të shmanget, dorëheqja e Lulzim Bashës dhe moskandidimi i Sali Berishës. Jeni konsumuar. PD-në nuk mund ta sjellë as Basha dhe as Berisha, mund ta sjellë në pushtet vetëm një ekip i pastër, i ri dhe i aftë. Përqafoni ndryshimin që të shpëtoni PD-në”, deklaroi Kadilli.
