“Asnjëherë si sot” Basha mban Kuvendin e PD, Jozefina Topalli del me mesazhin e fuqishëm

Ish-kryeparlamentarja Jozefina Topalli ka reaguar pas Kuvendit Kombëtar të PD që lideri Lulzim Basha po zhvillon sot në Pallatin e Kongreseve, kur në të njëjtën kohë ish-kreu i qeverisë Sali Berisha kërkon ta shkarkojë nga detyra me anë të një referendumi.

Ajo thekson se në votime për të larguar Lulzim Bashën kanë shkuar demokratë dhe themelues të degëve të kësaj partie.

Pas këtij të fundit, thotë Topalli, radhën e ka Kryeministri Edi Rama.

“Goodbye Lul! Sot duhet të rrish në radhë për të votuar në Referendumin e PD për largimin e LB!

Sot kanë shkuar për të votuar edhe ata demokratë që kanë vite që nuk dalin nga shtëpia; sot janë ngritur për të votuar nga themeluesit e degëve të PD deri tek anëtari më i ri i saj; sot janë ngritur nga shtrati të sëmurë për të votuar në referendum. Kanë votuar nga më të rinjtë deri tek më të moshuarit.

Asnjëherë nuk ka patur një pjesëmarrje demokratësh si kjo e sotmja. Kjo është dita e bukur e demokracisë! Kaq radhë nuk ka patur as në ditën e votimeve.

Kjo nuk është vetëm shprehja më e bukur e lirisë dhe demokracisë, kjo është mesazhi i shpresës; Me këtë pjesëmarrje e besim që njerëzit kanë tek çlirimi nga pengu ata po përcjellin shpresën për të larguar edhe qeverinë aktuale. Pas LB radhën e ka Rama! Goodbye Lul! Faleminderit çdo demokrati”, ka shkruar Jozefina Topalli.