Aldi Rama, i riu 21-vjeçar që vrau me një plumb në zemër efektivin e policisë Saimir Hoxha dje në Lezhë, ndërroi jetë sot në spitalin e Traumës si pasojë e plagës së marrë në kokë.
I riu ka qëlluar veten me pistoletë në kokë duke shkaktuar një plagë të parikuperueshme në tru.
Policia e gjeti atë me shenja jete ndërsa e nisën urgjentisht fillimisht në spitalin e Lezhës dhe më pas në Tiranë.
Rama njihej si person problematik dhe pavarësisht moshës së re mbante një mori veprash penale mbi vete. I dënuar për drogë dhe armëmbajtje pa leje, ai duhej të ishte në burg, por në maj 2021 është nxjerrë nga qelia duke u lënë vetëm me masën e sigurisë “Shërbim Prove”.
Ai publikonte në rrjetet sociale foto me armë, ndërsa e kishte mbuluar trupin me tatuazhe që mbartnin mesazhe të fortë.
Pas mbikëqyrjes së trupit, policia i gjeti në krahun e majtë një tatuazh që mbase shpjegon edhe agresivitetin e papritur të tij ndaj policisë një ditë më parë.
Në tatuazh shkruhet: Unë nuk jam një vrasës, por mos më detyroni të bëhem!
Kujtojmë që Rama ekzekutoi mëngjesin e djeshëm nënkomisarin Saimir Hoxha gjatë një kontrolli që policia po kryente në makinën ku ai udhëtonte me dy persona të tjerë. Pas krimit, ai mori makinën dhe u largua disa metra nga vendi i ngjarjes për t’u fshehur në zonën e pyllëzuar në Ishull Lezhë.
Pas kërkimeve që zgjatën shumë orë, policia e lokalizoi të riun duke i bërë thirrje që të dorëzohej, por i riu qëlloi veten në pjesën e djathtë të kokës, sipër veshit, duke humbur edhe jetën pak orë më pas në spital.
